त्रिपुरेश्वर बस आगलागीमा मृत्यु भएका चालक अर्जुन तामाङ रहेको पुष्टि, अरूको कागजात प्रयोग गरेको खुल्यो

काठमाडौं । त्रिपुरेश्वरमा सोमबार बसमा आगलागी हुँदा मृत्यु भएका चालकको पहिचान खुलेको छ । प्रहरीका अनुसार मृतक मकवानपुरको इन्द्रसरोवर गाउँपालिका–सिस्नेरीका अर्जुन दोङ तामाङ हुन् ।

काठमाडौं प्रहरी परिसरका एसएसपी दिलीप घिमिरेले प्रारम्भिक अनुसन्धानबाट अर्जुनले विभिन्न व्यक्तिको नाममा जारी भएका कागजात प्रयोग गर्दै आएको देखिएको जानकारी दिए । त्रिपुरेश्वर घटनाका क्रममा उनले दावा लामाको नाममा जारी भएको सवारीचालक अनुमतिपत्र प्रयोग गरेको खुलेको प्रहरीले जनाएको छ ।

अनुसन्धानका क्रममा अर्जुनले दावा लामाकै नाममा रहेको बैंक खाता र नागरिकतासमेत प्रयोग गरेको हुन सक्ने तथ्य फेला परेको छ । अन्य व्यक्तिका कागजात प्रयोग गर्नुको कारण र त्यसबाट भएका गतिविधिबारे प्रहरीले थप अनुसन्धान गरिरहेको छ ।

प्रहरीका अनुसार २०८२ साल कात्तिकमा बालाजुमा बस दुर्घटना हुँदा तीन जना घाइते भएको घटनामा पनि अर्जुनको संलग्नता देखिएको थियो । उक्त घटनापछि उनी फरार रहेको र त्यतिबेला उनले सुनील तामाङको नाममा जारी भएको सवारीचालक अनुमतिपत्र प्रयोग गरेको खुलेको एसएसपी घिमिरेले बताए ।

त्यसैगरी, करिब तीन महिनाअघि मूलपानी क्षेत्रमा ट्राफिक प्रहरीसँग अभद्र व्यवहार भएको घटनामा पनि अर्जुनले अर्कै व्यक्तिको नाममा जारी भएको सवारीचालक अनुमतिपत्र प्रयोग गरेको प्रहरी अनुसन्धानबाट खुलेको छ ।

अर्जुनले विगतमा अन्य व्यक्तिका नाममा जारी भएका नागरिकता, सवारीचालक अनुमतिपत्रलगायतका परिचयपत्र प्रयोग गरेको हुन सक्ने प्रहरीको आशंका छ । यसबारे थप प्रमाण तथा विवरण संकलन गरी अनुसन्धान अघि बढाइएको प्रहरीले जनाएको छ ।