देशभर मनसुनी प्रभाव, पहाडी तथा हिमाली क्षेत्रमा वर्षाको सम्भावना

काठमाडौं । नेपालमा मनसुनी वायुको प्रभाव अझै सक्रिय रहेको छ । जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थान आसपासमै रहेकाले देशका अधिकांश भू-भागमा बदली र वर्षाको अवस्था कायम रहनेछ ।

हाल मधेस प्रदेशका साथै कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा सामान्यतया बादल लागेको छ । लुम्बिनी र सुदूरपश्चिमका तराई क्षेत्रमा भने आंशिक बदलीसहित मौसम सामान्य रहेको छ ।

महाशाखाका अनुसार कोशी र बागमतीका केही स्थान तथा गण्डकी र कर्णालीका थोरै स्थानमा मध्यमसम्मको वर्षा भइरहेको छ । लुम्बिनी र सुदूरपश्चिमका एक–दुई स्थानमा पनि हल्का वर्षा भइरहेको छ ।

आज कोशी, बागमती, गण्डकी, लुम्बिनी, कर्णाली र सुदूरपश्चिमका हिमाली तथा पहाडी भू-भागमा दिनभर सामान्य बदली रहने अनुमान छ । मधेस र सुदूरपश्चिमका तराई क्षेत्रमा भने आंशिक बदली रहनेछ ।

दिउँसो तथा रातिको समयमा कोशी, बागमती, गण्डकी र लुम्बिनीका हिमाली तथा पहाडी क्षेत्रका केही स्थानमा मध्यम वर्षा हुनसक्नेछ । कर्णाली र सुदूरपश्चिमका हिमाली तथा पहाडी भू-भागका थोरै स्थानमा मध्यमसम्मको वर्षासँगै हिमपातको सम्भावना पनि रहेको महाशाखाले जनाएको छ ।

यस्तै, मधेससहित कोशी, बागमती, गण्डकी र लुम्बिनीका तराई क्षेत्रमा थोरै स्थानमा तथा सुदूरपश्चिमको तराईका एक–दुई स्थानमा मध्यमसम्मको वर्षा हुनसक्ने पूर्वानुमान गरिएको छ ।