बढ्यो पेट्रोलियमको मूल्य, निगम भन्छ– ‘१५ दिनमै करिब साढे एक अर्ब घाटा’

काठमाडौं । नेपाल आयल निगमले पेट्रोलियम पदार्थको मूल्य पुनः समायोजन गर्दै पेट्रोल, डिजेल र मट्टितेलको भाउ बढाएको छ । सोमबार बिहानदेखि लागू भएको नयाँ मूल्यअनुसार काठमाडौं उपत्यकासहितका तेस्रो वर्गका क्षेत्रमा पेट्रोल र डिजेल दुवैको मूल्य प्रतिलिटर २०० रुपैयाँ कायम गरिएको छ ।

निगमका अनुसार पेट्रोलमा प्रतिलिटर ३ रुपैयाँ तथा डिजेल र मट्टितेलमा ५ रुपैयाँले मूल्य बढाइएको हो । यसअघि काठमाडौं, पोखरा र दिपायलमा पेट्रोल १९७ रुपैयाँ र डिजेल १९५ रुपैयाँ प्रतिलिटरमा बिक्री हुँदै आएको थियो । नयाँ समायोजनपछि यी दुवै इन्धनको मूल्य समान बनेको छ । पहिलो र दोस्रो वर्गका क्षेत्रमा पनि सोही अनुपातमा मूल्य वृद्धि गरिएको निगमले जनाएको छ ।

हवाई इन्धनतर्फ भने आन्तरिक उडानका लागि प्रतिलिटर २० रुपैयाँले मूल्य बढाइएको छ । यससँगै आन्तरिक हवाई इन्धनको नयाँ मूल्य प्रतिलिटर २४९ रुपैयाँ पुगेको छ । अन्तर्राष्ट्रिय हवाई इन्धनमा काठमाडौंका लागि प्रति किलोलिटर १३१ अमेरिकी डलर वृद्धि गरिएको छ भने पोखरा र भैरहवाबाट हुने अन्तर्राष्ट्रिय उडानका लागि नाफा–नोक्सान बराबरी हुने मूल्य कायम गरिएको छ । खाना पकाउने एलपी ग्यासको मूल्य भने प्रति सिलिन्डर २,०६० रुपैयाँमै यथावत राखिएको छ ।

निगमका अनुसार भारतीय आयल कर्पोरेसन (आईओसी) बाट प्राप्त नयाँ खरिद मूल्यमा पेट्रोल प्रतिलिटर २०.१९ रुपैयाँ र डिजेल ३९.६७ रुपैयाँले महँगो भएर आए पनि उपभोक्तामाथि भार कम पार्ने उद्देश्यले सीमित मात्र मूल्य वृद्धि गरिएको हो ।

मूल्य समायोजनपछि पनि निगमको आर्थिक अवस्था सहज नभएको जनाएको छ । निगमका अनुसार हालको बिक्री मूल्यका आधारमा पनि प्रत्येक १५ दिनमा करिब १ अर्ब ४९ करोड रुपैयाँ घाटा हुने अनुमान गरिएको छ । अन्तर्राष्ट्रिय बजारमा इन्धनको मूल्य लगातार बढिरहेकाले आर्थिक दबाब झन् बढेको भन्दै निगमले इन्धनको प्रयोगमा मितव्ययिता अपनाउन उपभोक्तासँग आग्रह गरेको छ ।