देशभर मनसुन सक्रिय, आज रातिसम्म अति भारी वर्षाको सम्भावना

काठमाडौं । जल तथा मौसम पूर्वानुमान महाशाखाले देशभर मनसुनी प्रणाली सक्रिय रहेकाले आज दिनभर र रातिसम्म धेरै स्थानमा वर्षा हुने तथा केही क्षेत्रमा अति भारी वर्षाको सम्भावना रहेको जनाएको छ । सम्भावित वर्षाका कारण बाढी र पहिरोको जोखिम बढ्ने भएकाले आवश्यक सावधानी अपनाउन पनि महाशाखाले आग्रह गरेको छ ।

महाशाखाका अनुसार हाल नेपालभर मनसुनी वायुको प्रभाव कायम छ । मनसुनको न्यून चापीय रेखा पश्चिमतर्फ औसत स्थानभन्दा केही माथि नेपालको तराई आसपास रहेको छ भने पूर्वतर्फ औसत स्थानकै आसपास रहेको छ । यही प्रणालीका कारण देशका अधिकांश क्षेत्रमा बादल लागेको छ ।

हाल कोशी, बागमती, गण्डकी, लुम्बिनी र कर्णाली प्रदेशका केही स्थानमा तथा सुदूरपश्चिम प्रदेशका एक–दुई स्थानमा हल्कादेखि मध्यम वर्षा भइरहेको छ ।

आज दिउँसो देशभर सामान्यदेखि पूर्ण बदली रहने अनुमान गरिएको छ । कोशी, बागमती र गण्डकी प्रदेशका हिमाली क्षेत्रमा धेरै स्थानमा तथा लुम्बिनी, कर्णाली र सुदूरपश्चिमका हिमाली क्षेत्रमा केही स्थानमा मेघगर्जन र चट्याङसहित वर्षा हुने सम्भावना छ । साथै पहाडी र तराईका अधिकांश क्षेत्रमा पनि मध्यम वर्षाको पूर्वानुमान गरिएको छ ।

कोशी, बागमती, गण्डकी र लुम्बिनी प्रदेशका पहाडी तथा तराईका केही स्थानमा भारी वर्षा हुन सक्नेछ भने कर्णाली र सुदूरपश्चिमका एक–दुई स्थानमा पनि भारी वर्षाको सम्भावना रहेको महाशाखाले जनाएको छ ।

रातिको समयमा पनि मौसममा खासै सुधार नआउने पूर्वानुमान छ । देशभर अधिकांश स्थानमा बादल रहने र पहाडी तथा तराई क्षेत्रमा मेघगर्जनसहित वर्षा जारी रहने सम्भावना छ । विशेषगरी कोशी, बागमती, गण्डकी, लुम्बिनी र सुदूरपश्चिम प्रदेशका केही स्थानमा धेरै भारीदेखि अति भारी वर्षासमेत हुन सक्ने चेतावनी दिइएको छ ।

महाशाखाले अति भारी वर्षाको सम्भावना रहेका क्षेत्रमा नदी–नाला उर्लिन सक्ने, बाढी, पहिरो र डुबानको जोखिम उच्च रहने भएकाले जोखिमयुक्त स्थानका बासिन्दा, यात्रु तथा सरोकारवाला निकायलाई उच्च सतर्कता अपनाउन तथा मौसमसम्बन्धी आधिकारिक सूचना नियमित रूपमा पछ्याउन अनुरोध गरेको छ ।