संसद्मा उठेका विषयमा जवाफ दिन सरकारलाई सभामुखको निर्देशन

काठमाडौं । सभामुख डोलप्रसाद अर्यालले प्रतिनिधिसभामा सांसदहरूले उठाएका समसामयिक तथा जनसरोकारका विषयमा स्पष्ट जवाफ दिन नेपाल सरकारलाई निर्देशन दिएका छन् ।

सोमबारको प्रतिनिधिसभा बैठकमा आकस्मिक र शून्य समयमा सांसदहरूले बाढी, पहिरो, डुबान, विपद् तयारीदेखि कर्णाली राजमार्गमा भएको सवारी दुर्घटनासम्मका विषय उठाएपछि सभामुखले सरकारलाई संसद्मै जानकारी गराउन भने ।

सभामुख अर्यालले सांसदहरूले उठाएका विषय गम्भीर र महत्वपूर्ण भएकाले सम्बन्धित निकायले आवश्यक जवाफ दिनुपर्ने बताए । साथै देशका विभिन्न क्षेत्रमा बाढी, पहिरो र डुबानबाट हुन सक्ने जनधनको क्षति न्यूनीकरणका लागि गरिएको पूर्वतयारी र विपद् व्यवस्थापनका कामबारे पनि संसद्लाई जानकारी गराउन सरकारलाई निर्देशन दिए ।

बैठकमा कर्णाली राजमार्गमा हालै भएको सवारी दुर्घटनामा उद्धार कार्य प्रभावकारी नभएको भन्दै सत्तापक्ष र प्रतिपक्ष दुवैका सांसदहरूले सरकारको आलोचना गरेका थिए । उद्धारमा ढिलाइ भएको आरोपबारे गृहमन्त्रीले संसद्मा आएर जवाफ दिनुपर्ने माग पनि उठेको थियो ।

रमेश प्रसाईंले दुर्घटनापछि सरकारले आफ्नो सम्पूर्ण क्षमता परिचालन गरेर उद्धार गरेको हो वा होइन भन्ने विषयमा स्पष्ट जवाफ आवश्यक रहेको बताए । उनले दुर्घटनामा उद्धारमा लापरबाही भएको भन्ने आरोपको यथार्थ सार्वजनिक गर्न र भविष्यमा कर्णाली राजमार्गमा यस्ता घटना दोहोरिन नदिन सरकारले तयार पारेका दीर्घकालीन योजनाबारे पनि गृहमन्त्रीले संसद्मा जानकारी दिनुपर्ने माग गरे ।

सत्तापक्ष र प्रतिपक्ष दुवैतर्फबाट एउटै विषयमा सरकारको जवाफ माग भएपछि सभामुख अर्यालले सरकारलाई संसद्मै उपस्थित भएर आवश्यक स्पष्टीकरण दिन निर्देशन दिएका हुन् ।