ओलीसहित पाँच जनालाई विदेश जान रोक, उपत्यका छाड्न आयोगको अनुमति अनिवार्य

काठमाडौं । भदौ २३ र २४ गतेका घटनासम्बन्धी न्यायिक जाँचबुझ आयोगले तत्कालीन शीर्ष जिम्मेवार पाँच व्यक्तिमाथि विदेश यात्रामा रोक लगाउने निर्णय गरेको छ । आयोगको सचिवालयबाट असोज १२ गते जारी गरिएको प्रेस विज्ञप्तिमा उनीहरूलाई काठमाडौं उपत्यका छाड्नसमेत आयोगको स्वीकृति अनिवार्य हुने उल्लेख छ ।

आयोगले अनुसन्धानको दायरामा रहेका व्यक्तिहरू छानबिनका लागि कुनै पनि समयमा उपस्थित हुनुपर्ने भएकाले विदेश भ्रमण रोक लगाउन तथा स्वीकृतिबेगर उपत्यका नछाड्‍ने व्यवस्था मिलाउन सम्बन्धित निकायलाई पत्राचार गर्ने निर्णय गरेको छ ।

यात्रा रोकिएको सूचीमा रहेका पाँच व्यक्तिहरुमा पूर्व प्रधानमन्त्री केपी शर्मा ओली, पूर्व गृहमन्त्री रमेश लेखक, पूर्व गृहसचिव गोकर्णमणि दुवाडी, पूर्व राष्ट्रिय अनुसन्धान विभागका प्रमुख हुतराज थापा र पूर्व प्रमुख जिल्ला अधिकारी छविलाल रिजाल छन् ।

प्रेस विज्ञप्तिअनुसार आयोगले आवश्यक कारबाहीका लागि सम्बन्धित निकायमा पत्राचार गर्नेछ ।

यसबाहेक, भदौ २३ र २४ का घटनाहरूको प्रभावकारी छानबिन र प्रतिवेदन तयारीका लागि आयोगले थप जनशक्ति आवश्यक रहेको निष्कर्ष निकालेको छ । प्रभावकारी कार्यसम्पादनका लागि गृह मन्त्रालयलाई विज्ञसहितको जनशक्ति उपलब्ध गराउन पत्र पठाइने निर्णय पनि गरिएको छ ।