मेस्सीको शानदार फ्री–मेस्सीको छैटौँ गोलसँगै अर्जेन्टिनाको शतप्रतिशत नतिजा, अब केप भर्डसँग भेट

काठमाडौं । फिफा विश्वकप २०२६ अन्तर्गत समूह चरणको अन्तिम खेलमा अर्जेन्टिनाले जोर्डनलाई ३–१ ले पराजित गर्दै शतप्रतिशत जितसहित समूह ‘जे’ को विजेताका रूपमा अन्तिम ३२ मा प्रवेश गरेको छ ।

अमेरिकाको टेक्सासमा आइतबार भएको खेलमा मुख्य प्रशिक्षक लियोनेल स्कालोनीले टोलीमा नौ परिवर्तन गरेका थिए । यसअघि अस्ट्रियाविरुद्ध खेलेको टोलीबाट गोलरक्षक एमिलियानो मार्टिनेज र फरवार्ड लाउटारो मार्टिनेज मात्र सुरुआती रोजाइमा परेका थिए । कप्तान लियोनेल मेस्सीलाई विश्राम दिइएको थियो र उनी दोस्रो हाफमा बेन्चबाट मैदान प्रवेश गरेका थिए ।

अर्जेन्टिनाले खेलको १९औँ मिनेटमा जियोभानी लो सेल्सोको उत्कृष्ट फ्रिकिक गोलमार्फत अग्रता लिएको थियो । त्यसपछि भिडियो सहायक रेफ्री (भिएआर) को समीक्षा पछि प्राप्त पेनाल्टीलाई लाउटारो मार्टिनेजले गोलमा परिणत गर्दै पहिलो हाफमै टोलीलाई २–० को सहज अवस्थामा पुर्‍याए ।

दोस्रो हाफको ५५औँ मिनेटमा जोर्डनका मुसा अल–तमारीले नजिकको दूरीबाट गोल गर्दै अन्तर घटाए । त्यसको केही मिनेटपछि दर्शकहरूको ठूलो हुटिङबीच ३९ वर्षीय कप्तान मेस्सी मैदान प्रवेश गरेका थिए ।

खेलको ८०औँ मिनेटमा अर्जेन्टिनाले डी–बक्स बाहिर फ्रिकिकको अवसर पायो । उक्त अवसरलाई मेस्सीले आकर्षक प्रहारमार्फत सदुपयोग गर्दै बल सिधै जाली चुमाए र अर्जेन्टिनाको ३–१ को जित पक्का गरे ।

यो जारी विश्वकपमा मेस्सीको छैटौँ गोल हो । यसअघि उनले अल्जेरियाविरुद्ध ह्याट्रिक गरेका थिए भने अस्ट्रियाविरुद्ध दुई गोल गरेका थिए । यससँगै विश्वकप इतिहासमा मेस्सीको कुल गोल संख्या १९ पुगेको छ । उनी हाल प्रतियोगिताको सर्वाधिक गोलकर्ताको सूचीमा शीर्ष स्थानमा छन् ।

अर्जेन्टिनाले समूह चरणमा अल्जेरियालाई ३–० र अस्ट्रियालाई २–० ले पराजित गरेको थियो । तीनै खेल जित्दै उसले नौ अंकसहित समूह ‘जे’को शीर्ष स्थान सुरक्षित गरेको हो ।

अब साविक विजेता अर्जेन्टिनाले जुलाई ४ मा मियामीमा हुने अन्तिम ३२ को खेलमा विश्वकपमा पहिलो पटक सहभागी भएको केप भर्डसँग प्रतिस्पर्धा गर्नेछ । लगातार दोस्रो विश्वकप उपाधि जित्ने लक्ष्यमा रहेको अर्जेन्टिना सन् १९६२ मा ब्राजिलपछि लगातार विश्वकप जित्ने पहिलो टोली बन्ने अभियानमा छ ।