कांग्रेस एकतामा जोड, देउवालाई अभिभावकीय भूमिका रहन आग्रह

काठमाडौं । नेपाली कांग्रेसको केन्द्रीय समिति बैठकले पार्टीको एकता र सद्भाव कायम राख्न सबै तहका नेता–कार्यकर्तालाई अपिल गरेको छ । निर्वाचन आयोगले विशेष महाधिवेशनबाट निर्वाचित केन्द्रीय कार्यसमितिलाई औपचारिक मान्यता दिएपछि आज नयाँ बानेश्वरमा बसेको बैठकले यस्तो निर्णय गरेको हो ।

बैठकका निर्णय सार्वजनिक गर्दै पार्टी प्रवक्ता देवराज चालिसेले कांग्रेसका अगाडि चुनौतीहरू गम्भीर रहेको उल्लेख गर्दै एकतामै केन्द्रित हुने निष्कर्षमा बैठक पुगेको बताए । आगामी निर्वाचनको तयारी र जनतासँग पार्टीलाई थप सशक्त रूपमा जोड्ने उद्देश्यले एकता अपरिहार्य भएको उनको भनाइ छ ।

“जनतासँग नेपाली कांग्रेसलाई अझ मजबुत रूपमा जोड्नु छ, निर्वाचनको समय पनि नजिकिँदै छ,” चालिसेले भने, “त्यसैले पार्टीको एकता र आपसी सद्भावलाई सुदृढ गर्दै संगठनलाई उचाइमा पुर्‍याउन हार्दिक अपिल गर्ने निर्णय भएको छ ।”

बैठकले निवर्तमान केन्द्रीय सदस्यहरूलाई पनि पार्टी सुदृढीकरणमा सक्रिय भूमिका खेल्न आग्रह गरेको छ । साथै, निवर्तमान सभापति शेरबहादुर देउवालाई पार्टीभित्र अभिभावकीय भूमिकामा रहन आग्रह गर्ने निर्णय पनि बैठकले गरेको छ ।

प्रवक्ता चालिसेले देउवाले लामो समयसम्म पार्टीलाई दिएको योगदान र नेतृत्वको उच्च मूल्याङ्कन गरिएको जानकारी दिँदै आगामी दिनमा पनि उनको मार्गदर्शन पार्टीका लागि महत्वपूर्ण रहने विश्वास व्यक्त गरे ।

यसैबीच, प्रतिनिधिसभा निर्वाचनको उम्मेदवारी दर्ताको समय नजिकिँदै गएको सन्दर्भमा कांग्रेस उम्मेदवार चयन प्रक्रियामा जुटिसकेको पनि बैठकले जनाएको छ । पार्टीले संगठन सुदृढीकरण र निर्वाचन तयारीलाई सँगसँगै अघि बढाउने रणनीति लिएको बताइएको छ ।