सीमा सुरक्षा बैठककै क्रममा ढलेका सशस्त्र प्रहरीका एसपी घिमिरेको निधन

काठमाडौं । सशस्त्र प्रहरी बलका उपरीक्षक (एसपी) राजेश घिमिरेको हृदयघातका कारण निधन भएको छ । नेपाल–भारत सीमा सुरक्षा समन्वय बैठकका क्रममा बेहोस भएर ढलेका घिमिरेको उपचारका क्रममा गएराति मृत्यु भएको हो ।

शुक्रबार दिउँसो मोरङको विराटचोकमा सशस्त्र प्रहरी बल र भारतीय सीमा सुरक्षा बल (एसएसबी)का अधिकारीहरू सहभागी डीआईजी तहको समकक्ष बैठक चलिरहेको थियो । बैठककै क्रममा एसपी घिमिरे अचानक बेहोस भएर ढलेका थिए ।

सशस्त्र प्रहरी बल नम्बर १ बराह बाहिनी, सुनसरी पकलीका डीआईजी कुमार न्यौपानेका अनुसार घिमिरेलाई हृदयघात भएको थियो । ढलेलगत्तै उनलाई उपचारका लागि विराट टिचिङ अस्पताल लगिएको थियो ।

चिकित्सकको प्रयासका बाबजुद उपचार सफल हुन नसकी विराट मेडिकल कलेजमा राति ८ः५२ मा उनको निधन भएको डीआईजी न्यौपानेले जानकारी दिए । हाल एसपी घिमिरेको शव पोस्टमार्टमका लागि विराट टिचिङ अस्पतालकै शव गृहमा राखिएको छ ।