नौ वर्षीय सौतेनी छोराको हत्या गरेकी महिला २३ वर्षपछि काठमाडौंबाट पक्राउ

दाङ । करिब २३ वर्षअघि नौ वर्षीय सौतेनी छोराको हत्या गरी फरार रहेकी महिलालाई प्रहरीले काठमाडौंबाट पक्राउ गरेको छ ।

गढवा गाउँपालिका–७ मानपुरकी ५० वर्षीया वसन्ता शर्मा पण्डितलाई पक्राउ गरिएको जिल्ला प्रहरी कार्यालय दाङका प्रवक्ता प्रहरी नायब उपरीक्षक चक्रबहादुर शाहले जानकारी दिए । ती महिला काठमाडौंको नयाँ बसपार्क क्षेत्रबाट मंगलबार बिहान पक्राउ परेकी हुन् ।

२०५९ साल असार १९ गते वसन्ताले सौतेनी छोरा शरद शर्मालाई लाठी प्रहार गरी हत्या गरेपछि शव मलखादमा गाडेकी थिइन् । सो घटनामा जिल्ला अदालत दाङले २०६० साल असोज २६ गते उनलाई दुई वर्ष कैद सजाय सुनाएको थियो । तर, पुनरावेदन अदालत नेपालगञ्जले सोही वर्ष माघ ३ गते सजाय बढाएर १० वर्ष पुर्‍याएपछि उनी फरार भएकी थिइन् ।

वसन्ता काठमाडौंमा छोरा केशवराज शर्मासँग लुकीछिपी बस्दै आएको सूचना पाएपछि इलाका प्रहरी कार्यालय गढवाबाट प्रहरी टोली खटिएको थियो । टोलीले जिल्ला प्रहरी परिसर काठमाडौंको सहयोगमा उनलाई पक्राउ गरी कैद सजाय भुक्तानका लागि दाङ जिल्ला अदालत पठाएको जनाएको छ ।