वरिष्ठ अभिनेता सुनिल थापाको पशुपति आर्यघाटमा अन्त्येष्टि

काठमाडौं । वरिष्ठ अभिनेता सुनिल थापाको आइतबार साँझ पशुपति आर्यघाटमा हिन्दू परम्पराअनुसार अन्त्येष्टि गरिएको छ । शनिबार हृदयघातका कारण निधन भएका थापालाई उनका छोरा अनमोल थापाले दागबत्ती दिएका थिए ।

अन्त्येष्टिअघि चलचित्र विकास बोर्डका अध्यक्ष दिनेश डीसीले थापाको पार्थिव शरीरमा राष्ट्रिय झन्डा ओढाएका थिए । त्यसअघि श्रद्धाञ्जलीका लागि उनको पार्थिव शरीर चलचित्र विकास बोर्डको कार्यालयमा राखिएको थियो, जहाँ कलाकार, चलचित्रकर्मी तथा विभिन्न क्षेत्रका व्यक्तित्वले अन्तिम श्रद्धाञ्जली अर्पण गरेका थिए ।

६८ वर्षको उमेरमा निधन भएका थापा नेपाली चलचित्र क्षेत्रमा ‘राते काइँला’को पात्रबाट विशेष रूपमा परिचित थिए । उनले आफ्नो करिअरमा डेढ सयभन्दा बढी फिल्ममा अभिनय गरेका छन् ।

थापाले अभिनय यात्रा हिन्दी फिल्म ‘साहेब बहादुर’बाट सुरु गरेका थिए भने उनको पहिलो नेपाली फिल्म ‘मसाल’ हो । नेपाली फिल्मसँगै बलिउडमा समेत सक्रिय रहेका उनले प्रियंका चोपडा अभिनित ‘मेरी कोम’ फिल्ममा पनि अभिनय गरेका थिए । उनी पछिल्लो पटक नेपाली फिल्म ‘एक्लो’मा देखिएका थिए ।

उनका श्रीमती, एक छोरा र एक छोरी छन् ।