भारत–श्रीलंकामा संयुक्त रूपमा आईसीसी टी–२० विश्वकप सुरु हुँदै

काठमाडौं । विश्व क्रिकेटको महाकुम्भ मानिने आईसीसी पुरुष टी–२० विश्वकप आजदेखि भारत र श्रीलंकामा संयुक्त रूपमा सुरु हुँदैछ । प्रतियोगिताका खेल भारतका पाँच शहरका पाँच रंगशाला र श्रीलंकाका दुई शहरका तीन मैदानमा सञ्चालन हुनेछन् ।

यस संस्करणको विश्वकपमा कुल ५५ खेल खेलाइनेछ । भारततर्फ अहमदाबादको नरेन्द्र मोदी स्टेडियम, कोलकाताको इडेन गार्डेन, दिल्लीको अरुण जेट्ली स्टेडियम, मुम्बईको वानखेडे स्टेडियम र चेन्नईको एमए चिदम्बरम स्टेडियममा खेल हुनेछन् । यस्तै, श्रीलंकामा कोलम्बोस्थित आर. प्रेमादासा स्टेडियम र एसएससी क्रिकेट मैदान तथा क्यान्डीको पालकेले अन्तर्राष्ट्रिय क्रिकेट स्टेडियम प्रतियोगिताका केन्द्र रहनेछन् ।

आज विश्वकपको पहिलो दिन तीन खेल आयोजना हुँदैछन् । उद्घाटन खेल श्रीलंकाको कोलम्बोस्थित एसएससी मैदानमा पाकिस्तान र नेदरल्यान्ड्सबीच बिहान ११ः१५ बजे सुरु हुनेछ ।

भारतमा आज दुई खेल हुनेछन् । कोलकाताको इडेन गार्डेनमा समूह ‘सी’ अन्तर्गत स्कटल्यान्ड र वेष्ट इण्डिज आमनेसामने हुनेछन् । यो समूहमा नेपाल पनि रहेको छ । दुई पटक विश्वकप विजेता वेष्ट इण्डिज अनुभवी टोली हो भने स्कटल्यान्ड अन्तिम समयमा विश्वकपमा स्थान बनाएको टोली हो । सुरक्षा कारण देखाउँदै बंगलादेशले भारत भ्रमण अस्वीकार गरेपछि आईसीसीले वरियताका आधारमा स्कटल्यान्डलाई सहभागिता दिएको हो । यो खेल दिउँसो ३ः१५ बजे सुरु हुनेछ ।

पहिलो दिनको अन्तिम खेलमा घरेलु टोली भारतले अमेरिकासँग प्रतिस्पर्धा गर्नेछ । साविक विजेता भारतले मुम्बईको वानखेडे स्टेडियममा शनिबार राति ७ः१५ बजेबाट आफ्नो अभियान सुरु गर्नेछ ।

नेपालले समूह चरणका आफ्ना चारै खेल मुम्बईको वानखेडे स्टेडियममा खेल्ने तालिका छ । उसले आइतबार दुई पटकको च्याम्पियन इङ्ग्ल्यान्डविरुद्ध खेल्दै विश्वकप यात्रा प्रारम्भ गर्नेछ ।

प्रतियोगितामा सहभागी २० टोलीलाई चार समूहमा विभाजन गरिएको छ । समूह चरणपछि प्रत्येक समूहका शीर्ष दुई टोली सुपर ८ मा प्रवेश गर्नेछन् । सुपर ८ चरणका खेल फेब्रुअरी २२ देखि सुरु हुनेछन् । यस चरणका शीर्ष चार टोली सेमिफाइनलमा पुग्नेछन् । पहिलो सेमिफाइनल मार्च ४ र दोस्रो सेमिफाइनल मार्च ५ मा हुने तालिका छ भने फाइनल खेल मार्च ८ मा आयोजना हुनेछ ।