एनपीएलमा सुदूरपश्चिमको लगातार दोस्रो जित, पोखरा पराजित

काठमाडौं । नेपाल प्रिमियर लिग (एनपीएल) अन्तर्गत कीर्तिपुरस्थित त्रिवि क्रिकेट मैदानमा शुक्रबार साँझ सम्पन्न खेलमा सुदूरपश्चिम रोयल्सले पोखरा एभेन्जर्सलाई १८ रनले पराजित गर्दै लगातार दोस्रो जित दर्ता गरेको छ ।

१९४ रनको लक्ष्य पछ्याउने क्रममा पोखराले आठ विकेट गुमाउँदै १७५ रनमै सीमित भयो । लगातार दोस्रो हार ब्यहोरेको पोखरा अंक तालिकाको पुछारमा झरेको छ भने सुदूरपश्चिम चार अंक सहित शीर्ष स्थानमा उक्लिएको छ ।

पोखराका लागि कप्तान कुशल भुर्तेलले ३२ बलमा ४ चौका र ४ छक्कासहित ५३ रन बनाए । त्यसैगरी जेम्स निसमले २५ बलमा २ चौका र ५ छक्का प्रहार गर्दै ४७ रन जोडे । तर अन्य खेलाडीबाट उल्लेखनीय योगदान प्राप्त हुन सकेन ।

बलिङतर्फ सुदूरपश्चिमका हरमित सिंहले दुई विकेट लिए भने स्कट कुग्लिजिन, दीपेन्द्रसिंह ऐरी, अविनाश बोहरा र नरेन साउँदले समान एक–एक विकेट लिए ।

यसअघि ब्याटिङ गरेको सुदूरपश्चिमले सात विकेटको क्षतिमा एक सय ९३ रनको योगफल तयार पारेको थियो । पहिलो विकेटका लागि ओपनरद्वय जस ब्राउन र विनोद भण्डारीले १०.४ ओभरमा एक सय आठ रनको साझेदारी गरेका थिए ।

जस ब्राउनले ३५ बलमा चार चौका र पाँच छक्काको सहयोगमा ६८ रन बनाउँदा जिम्मी निसमको बलमा किरण ठगुन्नाको हातबाट क्याच आउट भए । अर्का ओपनर विनोद भण्डारी ४२ बलमा ६ चौका सहयोगमा ४३ रन बनाउँदा आकाश चन्दको बलमा कुशल भुर्तेलको हातबाट क्याच आउट नै हुन पुगे ।

१३ बलमा चार चौका र दुई छक्का सहयोगमा ३१ रन बनाउँदा क्रिस लिन भने जिम्मी निसमको बलमा अविशेक तिवारीको हातबाट क्याच आउट भए । कप्तान दीपेन्द्रसिंह ऐरी १५, स्कट कुग्लेजिन आठ र हरमित सिंहले चार रन बनाए । आरिफ शेख शून्यमा आउट भए भने  इशान पाण्डे ६ र नरेन साउँद चार रनमा अविजित रहे ।

पोखराका लागि जिम्मी निसमले तीन विकेट लिए । डान डाउथवेट र आकाश चन्दले दुई-दुई विकेट लिए ।

एनपीएलमा शनिबार दुई खेल हुनेछन् । पहिलो खेलमा कर्णाली याक्स र लुम्बिनी लायन्स तथा दोस्रो खेलमा काठमाडौं गोर्खाज र विराटनगर किंग्स आमनेसामने हुनेछन् ।