पाकिस्तानी आक्रमणमा तीन अफगान क्रिकेटरको मृत्यु, त्रिकोणीय टी–२० शृंखलाबाट फिर्ता हुने एसीबीको घोषणा

काठमाडौं । अफगानिस्तान क्रिकेट बोर्ड (एसीबी) ले पक्तिका प्रान्तमा पाकिस्तानतर्फबाट गरिएको आक्रमणमा तीन क्रिकेट खेलाडीको मृत्यु भएको पुष्टि गरेको छ । बोर्डले विज्ञप्ति जारी गर्दै घटनाको तीव्र निन्दा गरेको छ र खेलाडीहरूप्रति सम्मानस्वरूप पाकिस्तानसँगको आगामी टी–२० त्रिकोणीय श्रृंखला नखेल्ने निर्णय सार्वजनिक गरेको छ ।

एसीबीले कवीर, सिब्घतुल्लाह र हारुन नाम गरेका तीन खेलाडीको तस्बिर सेयर गर्दै उनीहरूलाई शुक्रबार साँझ सोही आक्रमणमा प्रत्यक्ष लक्ष्य बनाइएको जनाएको छ । घटना क्रममा थप पाँच जना सर्वसाधारणले पनि ज्यान गुमाएको बोर्डले उल्लेख गरेको छ ।

विज्ञप्तिमा भनिएको छ, “खेलाडीसँग एकात्मता र यस अमानवीय कृतिको विरोधस्वरूप अफगानिस्तान क्रिकेट बोर्डले नोभेम्बर अन्त्यमा पाकिस्तानसँग तय भएको त्रिकोणीय टी–२० श्रृंखलाबाट फिर्ता हुने निर्णय गरेको छ ।”

उक्त श्रृंखला नोभेम्बर १७ देखि २९ सम्म लाहोर र रावलपिण्डीमा पाकिस्तान, अफगानिस्तान र श्रीलंकाबीच आयोजना हुने तय गरिएको थियो । यस सम्बन्धमा पाकिस्तान क्रिकेट बोर्डले अहिलेसम्म कुनै औपचारिक प्रतिक्रिया दिएको छैन ।