एएफसी यू–२० महिला एसियन कप छनोटः नेपाल आज साउदी अरेबियाविरुद्ध मैदान उत्रिंदै

काठमाडौं । भुटानको राजधानी थिम्पुमा जारी एएफसी यू–२० महिला एसियन कप छनोटअन्तर्गत नेपालले आज साउदी अरेबियासँग दोस्रो खेल खेल्दैछ ।

दिउँसो १ः४५ बजे थिम्पुस्थित चाङलिमिथाङ स्टेडियममा हुने यस खेलमा नेपाल पहिलो जितको खोजीमा हुनेछ ।

नेपालले यसअघि समूहको पहिलो खेलमा आयोजक भुटानसँग १–१ को बराबरी खेलेको थियो । साउदी अरेबियाले भने प्रारम्भिक खेलमै उत्तर कोरियासँग १५–० को ठुलो अन्तरले पराजय व्यहोरेको थियो ।

नेपालले अझै समूहको सबभन्दा बलियो टोली उत्तर कोरियासँग खेल्न बाँकी छ । उत्तर कोरिया दुई पटक यू–२० महिला विश्वकप जितिसकेको टिम हो ।

यस छनोट चरणमा समूह विजेता सोझै एसियन कपका लागि छनोट हुनेछन्, साथै सबै समूहमध्ये दुई उत्कृष्ट उपविजेता टिमले पनि स्थान पाउनेछन् ।