भारतलाई एसिया कपको उपाधि, पाकिस्तान पाँच विकेटले पराजित

काठमाडौं । भारतले एसिया कपको उपाधि आफ्नो पोल्टामा पारेको छ । यूएईमा सम्पन्न फाइनल खेलमा पाकिस्तानलाई पाँच विकेटले पराजित गर्दै भारतले उपाधि जितेको हो ।

टस जितेर फिल्डिङ रोजेको भारतले पाकिस्तानलाई १४६ रनमा रोक्यो र जवाफी ब्याटिङमा १९ ओभर चार बलमा पाँच विकेट गुमाउँदै १५० रन बनायो ।

पाकिस्तानले साहिबजादा प्रहानको ५७ रन र फकर जमानको ४६ रनको सहयोगमा लय बनाउने प्रयास गरे पनि पछिल्लो क्रम धराशायी हुँदा १९ ओभर एक बलमै सबै विकेट गुमाएर १४६ रनमा समेटियो । अन्य ब्याट्सम्यान दोहोरो अंकमा रन जोड्न असफल भए ।

भारतका बलरहरूले उत्कृष्ट प्रदर्शन गरे । कुलदीप यादवले ४ विकेट लिए भने जसप्रित बुमराह, वरुण चक्रवर्ती र अक्षर पटेलले २-२ विकेट लिएर पाकिस्तानलाई सम्हालिन दिएनन् ।

भारतको जवाफी इनिङमा तिलक वर्मा नटआउट ६९ रन बनाएर नायक बने । ५३ बलमा खेलेको उनको इनिङले भारतको जित पक्का गरायो । शिभव दुवेले ३३ रन र सञ्जु श्यामसनले २४ रन जोड्दै जितमा सहयोग पुर्‍याए ।

पाकिस्तानका बलर फाइम अशरफले ३ विकेट लिए भने शाहिन अफ्रिदी र अब्रार अहमदले १–१ विकेट लिएका थिए ।

यस जितसँगै भारतले फेरि एकपटक एसिया कपको उपाधि आफ्नो नाममा लेखाउन सफल भएको छ ।