कोरियामा नेपाल पुलिसकी रमिला लामाले स्वर्ण जितिन्

काठमाडौं । नेपाल पुलिस क्लबकी तेक्वान्दो खेलाडी रमिला लामाले कोरियामा आयोजित ‘सङ्नाम कोरिया ओपन अन्तर्राष्ट्रिय तेक्वान्दो च्याम्पियनसिप २०२५’ मा स्वर्ण पदक जितेकी छिन् ।

यही साउन ३ गतेदेखि कोरियाको देइगुमा सञ्चालन भइरहेको ‘वल्र्ड युनिभर्सिटी एण्ड छुछेन कोरिया इन्टरनेशनल तेक्वान्दो च्याम्पियनसिप’ अन्तर्गत पुम्से (काता) विधाको ३० वर्ष मुनिको उमेर समूहमा उनले स्वर्ण जितेकी हुन् । तेस्रो सेटसम्मको प्रतिस्पर्धामा उनले कोरियाली प्रतिस्पर्धीलाई पछि पार्दै उपाधि आफ्नो पोल्टामा पारिन् ।

कोरियामा तेक्वान्दो संस्कृतिको प्रवर्द्धन गर्ने उद्देश्यले आयोजना गरिएको उक्त प्रतियोगितामा विभिन्न देशका खेलाडीहरूको सहभागिता रहेको छ ।

स्वर्ण जितपछि खेलाडी लामाले संक्षिप्त प्रतिक्रिया दिँदै भनिन्, ‘यो सफलताले आत्मविश्वास बढाएको छ । आगामी दिनहरूमा अझ मेहेनत गरेर देशको नाम झनै उज्यालो बनाउने लक्ष्य छ ।’

रमिलाको स्वर्ण जितप्रति उनको स्थायी बासस्थान काभ्रेको बेथानचोक गाउँपालिकाले पनि बधाई ज्ञापन गरेको छ । गाउँपालिका अध्यक्ष भगवान अधिकारीले सामाजिक सञ्जालमार्फत शुभकामना दिँदै भने, ‘रमिलाको जितले गाउँपालिकाको गौरव बढाएको छ ।’

काभ्रेको बेथानचोक गाउँपालिका–५ स्थित टाङ्गी टोलकी रमिला झ्यामयाङ्ग लामा र मानकुमारी लामाकी सुपुत्री हुन् । उनले च्याल्टीको आत्मा विकास माध्यमिक विद्यालयबाट एसईई परीक्षा सकेपछि २०७४ सालमा नेपाल प्रहरी सेवामा प्रवेश गरेकी थिइन् ।

नेपाल पुलिस क्लबका तर्फबाट विभिन्न राष्ट्रिय प्रतियोगिताहरूमा सहभागी हुँदै आएकी लामाले अघिल्लो वर्षहरूमा पनि कैयौँ उपाधि जितिसकेकी छिन् ।