साफ यू—२० महिला च्याम्पियनसिपमा नेपाल पुनः श्रीलंकासँग प्रतिस्पर्धा गर्दै

काठमाडौं । बंगलादेशमा जारी साफ यू—२० महिला फुटबल च्याम्पियनसिपमा नेपालले आज आफ्नो चौथो खेल खेल्दैछ । नेपाली टोलीको प्रतिद्वन्द्वी फेरि पनि श्रीलंका हुनेछ ।

डबल राउण्ड रोबिन ढाँचामा सञ्चालन भइरहेको प्रतियोगितामा नेपाल र श्रीलंकाबीचको यो दोस्रो आमनेसामने हो । पछिल्लो खेल मंगलबार सम्पन्न भएको थियो, जहाँ नेपालले श्रीलंकामाथि एकतर्फी प्रदर्शन गर्दै ७–० को विशाल जित दर्ता गरेको थियो ।

दुवै टोलीबीचको दोस्रो खेल आज दिउँसो २ः४५ बजे बसुन्धरा स्पोर्ट्स मैदानमा सुरु हुने तालिका छ । यसअघि च्याम्पियनसिपका खेलहरू बसुन्धरा किङ्स एरेनामा हुँदै आएका थिए, तर अब बाँकी चार खेलहरू (सातौंदेखि दशौंसम्म) बसुन्धरा स्पोर्ट्स ग्राउन्डमा हुने आयोजकले जानकारी दिएको छ ।

नेपालले प्रतियोगिताको सुरुवात भुटानविरुद्ध शानदार जितबाट गरेको थियो । पहिलो खेलमा नेपालले भुटानलाई ६–१ ले पराजित गरेको थियो । दोस्रो खेलमा भने घरेलु टोली बंगलादेशसँग ३–२ को हार व्यहोरेको थियो ।

श्रीलंकाले भने प्रतियोगितामा निराशाजनक प्रदर्शन गर्दै आएको छ । पहिलो खेलमा बंगलादेशसँग ९–१ को हार बेहोर्‍यो भने दोस्रो खेलमा भुटानसँग ५–० ले पराजित भयो ।

हालसम्मको अंक तालिकामा आयोजक बंगलादेश ९ अंकसहित शीर्ष स्थानमा छ । नेपाल ३ खेलबाट ६ अंक जोडेर दोस्रो स्थानमा रहेको छ भने भुटान ३ अंकका साथ तेस्रोमा छ । अंकविहीन श्रीलंका अन्तिम स्थानमा छ ।

चार टोली सहभागी प्रतियोगिता डबल राउन्ड रोबिन प्रारूपमा भइरहेको छ, जसअनुसार सबै टोली एकअर्कासँग दुईपटक खेल्नेछन् । अन्त्यमा सबैभन्दा बढी अंक बटुल्ने टोली प्रतियोगिताको विजेता घोषित हुनेछ ।