७२ वर्षपछि स्विट्जरल्यान्डको ऐतिहासिक उपलब्धि, कोलम्बियालाई हराउँदै क्वार्टरफाइनलमा अर्जेन्टिनासँग भेट

काठमाडौं । फिफा विश्वकप २०२६ अन्तर्गत राउन्ड अफ १६ को अन्तिम खेलमा स्विट्जरल्यान्डले कोलम्बियालाई पेनाल्टी सुटआउटमा ४–३ ले पराजित गर्दै ७२ वर्षपछि विश्वकपको क्वार्टरफाइनलमा स्थान सुरक्षित गरेको छ ।

क्यानडाको भ्यानकुभरस्थित बिसी प्लेस स्टेडियममा भएको प्रतिस्पर्धात्मक खेल निर्धारित ९० मिनेट तथा अतिरिक्त ३० मिनेटसम्म पनि गोलरहित बराबरीमा टुंगिएपछि नतिजा पेनाल्टी सुटआउटबाट तय गरिएको थियो ।

पेनाल्टीमा कोलम्बियाका जुआन क्विन्टेरो, जामिन्टन क्याम्पाज र लुइस डियाजले गोल गरे । तर डेभिन्सन सान्चेज र कुचो हर्नान्डेजले अवसर खेर फाल्दा टोली पराजित हुन पुग्यो ।

यता स्विट्जरल्यान्डका ग्रानिट जाका, जेकी आम्दोनी, सेड्रिक इटेन र रुबेन वर्गासले सफल प्रहार गरे। म्यानुअल अकांजीले भने आफ्नो पेनाल्टी गोलमा परिणत गर्न सकेनन् । त्यसपछि स्विट्जरल्यान्डले ४–३ को जित निकाल्दै अन्तिम आठमा स्थान बनायो ।

सन् १९५४ मा घरेलु भूमिमा आयोजित विश्वकपपछि पहिलो पटक स्विट्जरल्यान्ड क्वार्टरफाइनलमा पुगेको हो । त्यसयता टोली पटक–पटक समूह चरण वा अन्तिम १६ बाट बाहिरिँदै आएको थियो ।

यो स्विट्जरल्यान्डको १३औँ विश्वकप सहभागिता हो भने टोलीले समग्रमा चौथोपटक क्वार्टरफाइनलमा स्थान बनाएको हो ।

अब सेमिफाइनल प्रवेशका लागि स्विट्जरल्यान्डले साविक विश्व विजेता अर्जेन्टिनाको चुनौती सामना गर्नेछ ।