क्लब विश्वकपः रियललाई हराउँदै पीएसजी उपाधि नजिक, फाइनलमा चेल्सीसँग भिडन्त

काठमाडौं । पेरिस सेन्ट–जर्मेन (पीएसजी) क्लब विश्वकपको फाइनलमा प्रवेश गरेको छ । बुधबार राति सम्पन्न दोस्रो सेमिफाइनलमा स्पेनिस जायन्ट रियल मड्रिडमाथि ४–० को प्रचण्ड जित निकाल्दै फ्रेन्च क्लबले उपाधि यात्रामा बलियो कदम चालेको हो ।

पीएसजीको प्रभावशाली जितमा फेबियन रुइजले दुई गोल गरे भने ओसामाने डेम्बेले र गोन्कालो रामोसले एक–एक गोल थपे । खेलको छैटौँ मिनेटमै रुइजले गोल गर्दै पीएसजीलाई अग्रता दिलाए । त्यसपछि नवौँ मिनेटमा डेम्बेलेले गोल गर्दै त्यो अग्रता दोब्बर बनाए ।

यता, डेम्बेलेले खेलको पहिलो हाफमै व्यक्तिगत दोस्रो गोल गर्दै पीएसजीको तेस्रो गोल पूरा गरे । पहिलो हाफमै ३–० को मजबूत अग्रता लिएको फ्रेन्च टोलीले दोस्रो हाफको ८७औँ मिनेटमा रामोसको गोलमार्फत अन्तिम स्कोर ४–० मा पुर्‍यायो ।

अब उपाधिका लागि पीएसजीले आइतबार प्रिमियर लिग क्लब चेल्सीसँग प्रतिस्पर्धा गर्नेछ । चेल्सीले पहिलो सेमिफाइनलमा ब्राजिलियन क्लब फ्लुमिनेन्सलाई २–० ले हराउँदै फाइनल यात्रा तय गरिसकेको छ ।