स्पिन आक्रमणको कहर, ओमानमाथि ८७ रनको शानदार जितसँगै फाइनलमा नेपाल

काठमाडौं । मलेसियामा जारी एसीसी प्रिमियर कपको सेमिफाइनलमा नेपालले ओमानलाई ८७ रनले पराजित गर्दै फाइनलमा स्थान बनाएको छ । नेपालको जितमा स्पिन बलरहरूले उत्कृष्ट प्रदर्शन गरेपछि ओमान सामान्य लक्ष्य पछ्याउँदै पनि धराशायी बनेको हो ।

नेपालले दिएको १४८ रनको लक्ष्य पछ्याएको ओमान २८.१ ओभरमै ६० रनमा अलआउट भयो । ओमानका लागि जतिन्दर सिंहले सर्वाधिक २५ रन बनाउँदा जितेन रामानन्दीले १३ रन जोडे । अन्य कुनै पनि ब्याटरले दोहोरो अंकमा रन बनाउन सकेनन् ।

नेपालको बलिङमा कप्तान सन्दीप लामिछाने र दीपेन्द्रसिंह ऐरीले समान तीन–तीन विकेट लिए । रोहित पौडेल र ललित राजवंशीले समान दुई–दुई विकेट हात पारे ।

त्यसअघि टस हारेर पहिले ब्याटिङ गरेको नेपालले ४५.४ ओभरमा सबै विकेट गुमाउँदै १४७ रन बनाएको थियो । सुरुआत निकै कमजोर रहे पनि दीपेन्द्रसिंह ऐरी र बसिर अहमदले उत्कृष्ट साझेदारी गर्दै टोलीलाई सम्मानजनक योगफलसम्म पुर्‍याए ।

दीपेन्द्रले सर्वाधिक ५१ रन बनाए भने बसिरले ४७ रनको योगदान दिए । नेपाल ३६ रनमा चार विकेट गुमाएर दबाबमा परेको अवस्थामा यी दुईले पाँचौँ विकेटका लागि ९३ रनको महत्वपूर्ण साझेदारी गरेका थिए । देव खनालले १३ तथा आसिफ शेखले ११ रन बनाए ।

ओमानका जय ओडेडराले १० ओभरमा २६ रन खर्चेर तीन विकेट लिए । हस्नैन शाहले पनि ८.४ ओभरमा २८ रन दिँदै तीन विकेट हात पारे । मुहम्मद इमरानले दुई विकेट लिए भने शकील अहमद र मुजिबुर अलीले समान एक–एक विकेट लिए ।

यो जितसँगै नेपाल उपाधिका लागि यूएईसँग भिड्ने भएको छ । फाइनल खेल शनिबार हुनेछ । फाइनलमा जित हात पारे नेपाल एसिया कपमा छनोट हुनेछ ।

यद्यपि सेमिफाइनल जितेसँगै नेपालले एसीसी इमर्जिङ टिम्स एसिया कपमा भने आफ्नो स्थान पक्का गरिसकेको छ ।