मनसुनी प्रभाव कायमै, बागमतीसहित चार प्रदेशमा भारी वर्षाको जोखिम

काठमाडौं । देशभर मनसुनी वायुको प्रभाव कायम रहँदा आज पनि अधिकांश भूभागमा बदली र वर्षाको सम्भावना रहेको छ । जल तथा मौसम पूर्वानुमान महाशाखाका अनुसार मनसुनको न्यून चापीय रेखा पूर्वतर्फ सरदर स्थान आसपास तथा पश्चिमतर्फ सरदरभन्दा उत्तरमा नेपालनजिक रहेको छ ।

हाल कोशी, बागमती, कर्णाली र सुदूरपश्चिम प्रदेशका साथै गण्डकी र लुम्बिनीका हिमाली तथा पहाडी भूभागमा सामान्यतया बदली छ । मधेस प्रदेश तथा गण्डकी र लुम्बिनीका तराई क्षेत्रमा आंशिक बदली रहेको छ । कोशी, बागमती, लुम्बिनी, कर्णाली र सुदूरपश्चिमका विभिन्न स्थानमा मध्यम वर्षा भइरहेको छ भने गण्डकीका एक–दुई स्थानमा पनि वर्षा भइरहेको महाशाखाले जनाएको छ ।

दिउँसो देशभर सामान्यतया बदली रहनेछ । हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ । यस्तै, मधेससहित कोशी, बागमती, गण्डकी, लुम्बिनी र सुदूरपश्चिमका तराई क्षेत्रमा पनि मेघगर्जनसहित मध्यम वर्षा हुनसक्नेछ ।

महाशाखाले बागमती, गण्डकी र कर्णालीका पहाडी भूभाग तथा लुम्बिनीका पहाडी र तराई क्षेत्रमा एक–दुई स्थानमा भारी वर्षा हुनसक्ने जनाएको छ ।

राति हिमाली तथा पहाडी क्षेत्रमा सामान्य बदली र तराईमा आंशिक बदली रहने अनुमान गरिएको छ । हिमाली तथा पहाडी क्षेत्रका केही स्थानमा मेघगर्जन, चट्याङसहित मध्यम वर्षा तथा हिमपात हुनसक्नेछ । गण्डकी, लुम्बिनी र सुदूरपश्चिमका तराई क्षेत्रमा तथा मधेससहित कोशी र बागमतीका तराई क्षेत्रमा पनि मध्यम वर्षाको सम्भावना छ ।

रातिको समयमा बागमती, गण्डकी र कर्णालीका पहाडी भूभागका एक–दुई स्थानमा भारी वर्षा हुनसक्ने पूर्वानुमान गरिएको छ ।

भारी वर्षाको सम्भावना भएका क्षेत्रमा बाढी, पहिरो, गेग्रान बहाव र भूक्षयको जोखिम बढ्न सक्ने भएकाले सतर्कता अपनाउन महाशाखाले आग्रह गरेको छ । वर्षाका कारण कृषि, स्वास्थ्य, पर्यटन, पर्वतारोहण तथा सडक र हवाई यातायातमा असर पर्नसक्ने भएकाले मौसमसम्बन्धी पछिल्ला सूचना तथा पूर्वानुमानमा अद्यावधिक रहन पनि अनुरोध गरिएको छ ।