४६ जिल्लामा आकस्मिक बाढीको जोखिम, जल तथा मौसम विभागको पहेँलो चेतावनी

काठमाडौं । जल तथा मौसम विज्ञान विभागको बाढी पूर्वानुमान महाशाखाले आज (साउन २७, मंगलबार) का लागि ४६ जिल्लामा आकस्मिक बाढीको सम्भावना रहेको भन्दै पहेँलो चेतावनी जारी गरेको छ ।

महाशाखाका अनुसार बिहानको मापनमा कोसी नदीका सहायक नदीहरू सतर्कता तह आसपासमा छन् । नारायणी, बागमती, कर्णाली, महाकाली, कन्काई, कमला, पूर्वी राप्ती, पश्चिम राप्ती र बबई नदीको बहाव सतर्कता तहभन्दा तल भए पनि बढ्ने सम्भावना देखिएको छ ।

इलाम, झापा, पाँचथर, तेह्रथुम, धनकुटा, सुनसरी, मोरङ, दोलखा, सिन्धुपाल्चोक, मकवानपुर, चितवन, पर्सा, बारा, डोल्पा, कैलाली, कञ्चनपुर र आसपासका क्षेत्रमा बहने साना नदीहरूको बहाव उल्लेख्य बढ्ने र आकस्मिक बाढीको उच्च सम्भावना रहेको छ ।

ताप्लेजुङ, संखुवासभा, भोजपुर, खोटाङ, ओखलढुंगा, सोलुखुम्बु, सिरहा, सप्तरी, रौतहट, सर्लाही, उदयपुर, सिन्धुली, काभ्रेपलाञ्चोक, काठमाडौं, ललितपुर, भक्तपुर, धादिङ, नुवाकोट, रसुवा, लमजुङ, पर्वत, बागलुङ, म्याग्दी, प्युठान, बर्दिया, रुपन्देही, नवलपरासी–पश्चिम, डडेलधुरा, डोटी, बैतडी र आसपासका जिल्लामा मध्यम सम्भावना रहेको महाशाखाले जनाएको छ ।

उल्लिखित जिल्लाका बासिन्दालाई बाढीको सम्भावित प्रभावबाट जोगिन सतर्क रहन, नदी किनार क्षेत्र टाढा बस्न र आकस्मिक परिस्थितिका लागि तयारी अवस्थामा रहन विभागले आग्रह गरेको छ ।