संघीय संसद्का दुवै सदन आज बस्दै, आर्थिक सर्वेक्षणदेखि चलचित्र विधेयकसम्म छलफल हुने

काठमाडौं । संघीय संसद्अन्तर्गत प्रतिनिधिसभा र राष्ट्रियसभाको बैठक आज (बुधबार) फरक–फरक समयमा बस्ने भएको छ । संसद् सचिवालयका अनुसार प्रतिनिधिसभाको बैठक बिहान ११ः०० बजे र राष्ट्रियसभाको बैठक दिउँसो १ः१५ बजेका लागि तय गरिएको छ ।

प्रतिनिधिसभाको आजको बैठकमा राष्ट्रियसभाबाट प्राप्त ‘अभौतिक सांस्कृतिक सम्पदा (संरक्षण) विधेयक, २०८१’ सम्बन्धी सन्देशसहितको विधेयक प्रस्तुत गरिने सम्भावित कार्यसूची रहेको छ । साथै, अर्थमन्त्री डा. स्वर्णिम वाग्लेले आर्थिक वर्ष २०८२/८३ को आर्थिक सर्वेक्षण पेश गर्ने कार्यक्रम रहेको छ ।

त्यसैगरी, सञ्चार तथा सूचना प्रविधिमन्त्री डा. विक्रम तिमिल्सिनाले राष्ट्रियसभामा उत्पत्ति भएको ‘चलचित्र विधेयक, २०८२’ माथि विचार गरियोस् भन्ने प्रस्ताव संसद्मा पेश गर्ने तयारी रहेको सचिवालयले जनाएको छ ।

उता राष्ट्रियसभाको बैठकमा पनि अर्थमन्त्री वाग्लेले आगामी आर्थिक वर्षको आर्थिक सर्वेक्षण प्रस्तुत गर्ने कार्यसूची रहेको छ । साथै, प्रतिनिधिसभाबाट सन्देशसहित प्राप्त ‘वैकल्पिक विकास वित्त परिचालन विधेयक, २०८२’ माथि छलफल अघि बढाउन प्रस्ताव पेश गरिनेछ ।

यसैबीच, प्रतिनिधिसभाअन्तर्गत कृषि, सहकारी तथा प्राकृतिक स्रोत समितिको बैठक पनि आज बिहान बस्दैछ । बैठकमा किसानका लागि रासायनिक मलको सहज आपूर्ति, मौज्दात अवस्था, वितरण प्रणाली तथा आगामी योजनाबारे कृषि सामग्री कम्पनी लिमिटेड र साल्ट ट्रेडिङ कर्पोरेसन लिमिटेडका पदाधिकारीसँग विस्तृत छलफल गरिने जनाइएको छ ।