महाधिवेशन तयारीमा जुट्यो रास्वपा, देशभर नेताहरू परिचालन (सूचीसहित)

काठमाडौं । राष्ट्रिय स्वतन्त्र पार्टी (रास्वपा) ले पहिलो महाधिवेशनलाई लक्षित गर्दै देशभरका संगठनात्मक गतिविधि तीव्र बनाएको छ । पार्टीले वडा, पालिका, जिल्ला र प्रदेश तहका भेला तथा अधिवेशन सम्पन्न गराउन केन्द्रीय नेताहरूलाई विभिन्न जिल्लामा खटाएको हो ।

रास्वपाले असार ७ देखि ९ गतेसम्म चितवनमा पहिलो महाधिवेशन गर्ने निर्णय गरिसकेको छ । त्यसको तयारीस्वरूप पार्टीले सबै तहका संरचनाको अधिवेशन तालिका सार्वजनिक गरेको छ ।

पार्टीका केन्द्रीय पदाधिकारी, सचिवालय सदस्य, सांसद, संघीय नेतृत्व मञ्च तथा विभागमा रहेका नेताहरूलाई जिल्ला–जिल्लाको जिम्मेवारी दिइएको छ । उनीहरूले स्थानीय तहमा भेला आयोजना गर्ने, तदर्थ समिति गठन गर्ने तथा अधिवेशन सम्पन्न गराउन समन्वय गर्ने जिम्मेवारी पाएका छन् ।

रास्वपाका अनुसार तदर्थ समिति गठन हुन नसकेका वडाहरूमा जेठ २ गते भेला गरिएको थियो भने वैशाख २० गतेअघि समिति बनेका वडाको अधिवेशन जेठ ३ गते सम्पन्न भएको छ । अर्को चरणको वडा अधिवेशन जेठ १६ गते हुनेछ ।

पालिका तहको भेला जेठ ९ गते र पालिका अधिवेशन जेठ १० तथा १७ गते गर्ने कार्यतालिका तय गरिएको छ । जिल्ला अधिवेशन जेठ २३ र २४ गते हुनेछ भने प्रदेश अधिवेशन जेठ २६ गतेदेखि सुरु भई असार १ गतेसम्म चल्नेछ ।

पार्टीले वडा र पालिकामा कम्तीमा ३० प्रतिशत अधिवेशन सम्पन्न भए पनि माथिल्लो तहको अधिवेशन गर्न सकिने व्यवस्था गरेको जनाएको छ ।

जिल्ला प्रतिनिधि छनोटमा अधिकांश सांसदलाई आफ्नै जिल्ला जिम्मा दिइएको छ । मन्त्रीहरूलाई भने महाधिवेशनसम्बन्धी जिम्मेवारीमा नखटाइएको रास्वपाले जनाएको छ ।

महामन्त्री कविन्द्र बुर्लाकोटीलाई गोरखा, सहमहामन्त्री विपिन आचार्यलाई दाङ, सचेतक क्रान्तिशिखा धिताललाई रोल्पा, प्रवक्ता मनिष झालाई धनुषा र सहप्रवक्ता रमेश प्रसाईंलाई ताप्लेजुङको जिम्मेवारी दिइएको छ ।

त्यस्तै, पूर्व उपसभामुख इन्दिरा रानामगर र पूर्व सचेतक निशा डाँगीलाई झापा तथा सांसद रञ्जु दर्शनालाई काठमाडौंका लागि प्रतिनिधि तोकिएको छ ।

हेर्नुहोस् सूची