निर्वाचन आयोगले दियो गगन नेतृत्वको कांग्रेसलाई मान्यता, देउवा पक्षको विरोध

काठमाडौं । निर्वाचन आयोगले गगनकुमार थापा नेतृत्वको नेपाली कांग्रेसलाई आधिकारिक मान्यता दिएको छ । आयोगको शुक्रबार बसेको बैठकले थापालाई पार्टी सभापतिको हैसियतमा वैधानिकता प्रदान गरेको हो ।

राजधानीको भृकुटीमण्डपमा पुस २७ देखि ३० गतेसम्म सम्पन्न विशेष महाधिवेशनबाट थापा बहुमत महाधिवेशन प्रतिनिधिको समर्थनसहित सभापति चयन भएका थिए । सभापति निर्वाचित भएपछि बिहीबार बसेको केन्द्रीय समिति बैठकको निर्णयसहित थापाले आयोगमा आधिकारिकताको दाबी पेश गरेका थिए । आयोगले सबै आवश्यक कागजात अध्ययन गरी थापा नेतृत्वको केन्द्रीय समितिलाई मान्यता दिएको जनाएको छ ।

आयोगको निर्णयसँगै नेपाली कांग्रेसको चुनाव चिह्न रुख र चारतारे झण्डा शेरबहादुर देउवा पक्षबाट गुमेको छ । यद्यपि देउवा समूहले आफूहरू नै आधिकारिक भएको दाबी गर्दै आयोगमा छुट्टै कागजात बुझाएको थियो ।

देउवा पक्षको विरोध प्रदर्शन
निर्वाचन आयोगले थापा नेतृत्वलाई आधिकारिकता दिएपछि शेरबहादुर देउवा पक्षले आयोग परिसर बाहिर नाराबाजी र प्रदर्शन गरेको छ । मूल गेट बाहिर कार्यकर्ताहरूले विरोध जनाइरहेका छन् ।

आयोगमा देउवा समूहका नेताहरू मीनेन्द्र रिजाल, प्रकाशशरण महत, पूर्णबहादुर खड्का लगायतको उपस्थिति रहेको छ । सम्भावित सुरक्षा चुनौतीलाई ध्यानमा राख्दै ठूलो संख्यामा प्रहरी परिचालन गरिएको छ ।

यसअघि कार्यवाहक सभापति पूर्णबहादुर खड्काले सानेपामा आयोजित पत्रकार सम्मेलनमा आफूहरूलाई आधिकारिकता नदिइए देशव्यापी आन्दोलन गर्ने चेतावनी दिएका थिए ।