प्रधानमन्त्रीको अभिव्यक्तिप्रति वर्षमान पुनको आपत्ति, आचारसंहिता कडाइका साथ लागू गर्न आयोगलाई आग्रह

काठमाडौं । नेपाली कम्युनिस्ट पार्टी (नेकपा) का नेता वर्षमान पुनले प्रधानमन्त्री सुशीला कार्कीले युवा पुस्ता (जेन–जी) लाई निर्वाचनमा जिताउनुपर्छ भन्ने आशयको अभिव्यक्ति दिएकोप्रति आपत्ति जनाएका छन् । प्रधानमन्त्री तथा मन्त्रीहरूले सार्वजनिक रूपमा यस्ता अभिव्यक्ति दिनु निर्वाचन आचारसंहिताको मर्मविपरीत हुने उनको भनाइ छ ।

शुक्रबार निर्वाचन आयोगले आयोजना गरेको निर्वाचन आचारसंहिता सम्बन्धी छलफल कार्यक्रममा बोल्दै नेता पुनले निर्वाचनमा राज्यको शक्ति, स्रोत र साधनको दुरुपयोग हुन नदिन आयोगले विशेष सतर्कता अपनाउनुपर्ने बताए । गैरदलीय सरकारको अवस्थामै प्रधानमन्त्री र मन्त्रीहरूबाट कसलाई जिताउने र कसलाई हराउने भन्ने खालका भाषण सार्वजनिक रूपमा आउनु गम्भीर विषय भएको उनले उल्लेख गरे ।

उनले प्रदेश र स्थानीय तहसहित विभिन्न स्तरका सरकारहरू सक्रिय रहेकाले आचारसंहिता कागजमै सीमित नहोस्, यसको प्रभावकारी कार्यान्वयन सुनिश्चित गर्न भरपर्दो अनुगमन संयन्त्र आवश्यक रहेको बताए । साथै सूचना प्रविधिको प्रयोगमार्फत हुने सम्भावित दुरुपयोगतर्फ पनि निर्वाचन आयोगले विशेष ध्यान दिनुपर्नेमा पुनले जोड दिए ।

नेता पुनका अनुसार निष्पक्ष, स्वतन्त्र र विश्वसनीय निर्वाचन सम्पन्न गर्न राज्य संयन्त्रबाट हुने कुनै पनि प्रकारको प्रभाव र प्रविधिको दुरुपयोगलाई समयमै नियन्त्रण गर्नु निर्वाचन आयोगको प्रमुख दायित्व हो ।