निर्वाचन स्वच्छ बनाउन आचारसंहिता लागू हुने तयारी

काठमाडौं । प्रतिनिधिसभा सदस्य निर्वाचनलाई निष्पक्ष, स्वच्छ र मर्यादित बनाउने उद्देश्यसहित निर्वाचन आयोगले आचारसंहिता लागू गर्ने अन्तिम चरणको तयारी पूरा गरेको छ । आयोगका अनुसार आगामी माघ ३ गतेदेखि आचारसंहिता कार्यान्वयनमा ल्याइनेछ ।

आयोगले फागुन २१ गतेका लागि तोकिएको निर्वाचन सम्बन्धी हालसम्मको प्रगति विवरण प्रधानमन्त्री सुशीला कार्कीलाई अवगत गराएको छ । निर्वाचन तयारी, सामग्री छपाइ, जनशक्ति व्यवस्थापनलगायत विषयमा आयोगका तर्फबाट कार्यवाहक प्रमुख निर्वाचन आयुक्त रामप्रसाद भण्डारीले शुक्रबार प्रधानमन्त्रीलाई जानकारी गराएका हुन् ।

आयोगका प्रवक्ता नारायणप्रसाद भट्टराईका अनुसार आचारसंहितामा सरकारी तथा गैरसरकारी निकायले गर्न पाउने र नपाउने गतिविधि, राजनीतिक दल तथा सरोकारवालाको जिम्मेवारी स्पष्ट रूपमा उल्लेख गरिएको छ । यसले निर्वाचन प्रक्रियालाई पारदर्शी र व्यवस्थित बनाउन सहयोग पुर्‍याउने अपेक्षा गरिएको छ ।

आयोगको बुझाइमा आचारसंहिता प्रभावकारी रूपमा कार्यान्वयन गर्न सरकार र सम्बन्धित सबै निकायको सक्रिय भूमिका अत्यन्त आवश्यक छ । आचारसंहिता कडाइका साथ पालना गरिएमा निर्वाचनको विश्वसनीयता थप मजबुत हुने आयोगले जनाएको छ ।