सागरनाथ वन विकास परियोजनामा कार्यरत वन संरक्षकको विभत्स हत्या

सर्लाही । सर्लाही जिल्लामा वन संरक्षकको अत्यन्तै निर्मम तरिकाले हत्या भएको छ । ईश्वरपुर नगरपालिका–२, राइटरखोरस्थित परियोजनाको जंगलमा ४७ वर्षीय रामेश्वर महतोको शव फेला परेको हो ।

रामेश्वर महतो सागरनाथ वन विकास परियोजनामा ज्यालादारीमा चौकीदार (वन हेरालु) का रूपमा कार्यरत थिए । घर नजिकैको परियोजनाको जंगलमा उनको टाउको नभएको अवस्थामा शव फेला परेको जिल्ला प्रहरी कार्यालय सर्लाहीले जनाएको छ ।

शनिबार बिहान करिब ५ बजे घरबाट निस्किएका रामेश्वर दिउँसोसम्म परिवार तथा परियोजनाका सहकर्मीसँग सम्पर्कमा आएनन् । उनको मोबाइल फोन पनि स्विच–अफ रहेपछि परिवार र परियोजनाका कर्मचारीले खोजी सुरु गरेका थिए ।

सुरक्षाकर्मीको सहयोगमा गरिएको खोजीका क्रममा जंगलभित्र उनको शव फेला परेको हो । घटनास्थल नजिकै रगत लागेको बन्चरो पनि भेटिएको प्रहरीले जनाएको छ ।

जिल्ला प्रहरी कार्यालय सर्लाहीका सूचना अधिकारी प्रहरी नायब उपरीक्षक (डीएसपी) सरोज राईका अनुसार बन्चरोले घाँटी काटिएको जस्तो देखिन्छ तर टाउको अहिलेसम्म फेला परेको छैन ।

उनका अनुसार तालिमप्राप्त कुकुरले घटनास्थलबाट केही पर रहेको पोखरीतर्फ संकेत गरेको छ । पोखरीमा जाल हान्ने वा पानी सुकाएर खोजी गर्ने तयारी प्रहरीले गरेको छ ।

प्रहरीले घटनामा संलग्न रहेको आशंकामा एक जना व्यक्तिलाई पक्राउ गरिसकेको जनाएको छ । बाँकी अभियुक्तलाई पनि पक्राउ गरी कानुनी कारबाही गरिने प्रहरीले विश्वास व्यक्त गरेको छ ।

रामेश्वर महतोको विभत्स हत्याले परिवारजन र आफन्त शोकमा डुबेका छन् भने स्थानीय बासिन्दा त्रसित बनेका छन् ।