बहुविवाह प्रकरणमा एमाले नेता शेर्पा कारागार चलान

काठमाडौं । नेकपा एमालेका केन्द्रीय सदस्य पासाङ शेर्पा बहुविवाह मुद्दामा दोषी ठहर भएपछि डिल्लीबजार कारागार चलान भएका छन् ।

बुधबार अदालतको फैसला कार्यान्वयनका लागि शेर्पालाई अदालतमा पेश गरिएको थियो । अदालतले कारागार पठाउने आदेश दिएपछि उनलाई डिल्लीबजार कारागार लगिएको जिल्ला प्रहरी परिसर काठमाडौंका प्रवक्ता एसपी पवनकुमार भट्टराईले जानकारी दिए ।

शेर्पा मंगलबार धुम्बाराहीबाट पक्राउ परेका थिए । बहुविवाहसम्बन्धी मुद्दामा उनलाई एक वर्ष कैद र पाँच हजार रुपैयाँ जरिवानाको सजाय तोकिएको हो ।

उनको विषय एमाले सचिवालयको अघिल्लो बैठकमा पनि उठेको थियो । सचिव योगेश भट्टराईले पार्टीभित्रका सांस्कृतिक विचलनबारे कुरा उठाउँदै शेर्पालाई निलम्बन गर्नुपर्ने सुझाव दिएका थिए । तर, अध्यक्ष केपी शर्मा ओलीले उक्त विषयलाई सामान्य ठहर गर्दै निलम्बन नगर्ने अडान लिएका थिए ।

पासाङ शेर्पा विगतमा अशोक राईसँगै रहेर काम गरेका थिए । पछि उनी डा. बाबुराम भट्टराईको नयाँ शक्ति पार्टी हुँदै माओवादी केन्द्र र अन्ततः एमालेमा आएका थिए ।