साम्पाङको नेतृत्वमा नयाँ राजनीतिक दल ‘श्रम संस्कृति पार्टी’ दर्ता

काठमाडौं । धरान उपमहानगरपालिकाका वर्तमान मेयर हर्क साम्पाङ नेतृत्वमा नयाँ राजनीतिक दल श्रम संस्कृति पार्टी निर्वाचन आयोगमा दर्ता भएको छ ।

निर्वाचन आयोगका प्रवक्ता नारायणप्रसाद भट्टराईले आइतबार दिउँसो साम्पाङलाई दर्ताको प्रमाणपत्र प्रदान गरिएको जानकारी दिए । “उहाँलाई भर्खरै पार्टी दर्ताको प्रमाणपत्र प्रदान गरियो,” उनले भने ।

साम्पाङ गत स्थानीय तहको निर्वाचनमा स्वतन्त्र उम्मेदवारको रूपमा धरान उपमहानगरपालिकाको मेयर पदमा विजयी भएक थिए । केही समयअघि उनले आफ्नो अध्यक्षतामा नयाँ दल गठन गर्ने योजना अघि बढाएका थिए । यही उद्देश्यका लागि असोज १२ गते निर्वाचन आयोगमा दर्ताका लागि निवेदन बुझाइएको थियो ।

पार्टीले ‘माटो’लाई आफ्नो चुनाव चिन्हको रूपमा चयन गरेको छ ।

पार्टी संरचनामा उपाध्यक्ष देवराज लामा, महासचिव आर्यन राई, र कोषाध्यक्ष समिता राई रहेका छन् ।

साम्पाङले पार्टी गठनसँगै देशभर युवापुस्ता र श्रमजीवी वर्गको प्रतिनिधित्व सुनिश्चित गर्ने योजना रहेको बताए । उनका अनुसार, “श्रम संस्कृति पार्टीले स्थानीय तहदेखि संघीय तहसम्मको नीति निर्माणमा सर्वसाधारणको आवाज उठाउने छ ।”

यो दलको दर्ताले आगामी निर्वाचनमा नयाँ राजनीतिक विकल्पको रूपमा देखिने सम्भावना बढाएको छ ।