२१ दिनभित्र बक्यौता बुझाउन विद्युत प्राधिकरणको अल्टिमेटम

काठमाडौं । नेपाल विद्युत प्राधिकरणले डेडिकेटेड फिडर र ट्रंकलाइन मार्फत विद्युत उपयोग गर्ने उद्योगीहरूलाई बक्यौता तिर्न २१ दिने समयसीमा तोकेको छ । आइतबार सार्वजनिक गरेको सूचनामा प्राधिकरणले आगामी कात्तिक १७ भित्र बाँकी रकम बुझाउन निर्देशन दिएको हो ।

२०७२ माघदेखि २०७५ वैशाखसम्मको अवधि सम्मको विद्युत महसुल नबुझाएका ग्राहकहरूले तोकिएको म्यादभित्र भुक्तानी गर्नुपर्ने प्राधिकरणले स्पष्ट पारेको छ । यसअघि प्रशासकीय पुनरावलोकनका लागि जेठ २०८२ सम्म निवेदन दिन सकिने व्यवस्था थियो, जसअन्तर्गत २०८२ वैशाख २६ र ३० गते सूचना प्रकाशित गरिएको थियो ।

प्राधिकरण सञ्चालक समितिको १० असोजको निर्णयअनुसार पुनरावलोकनसम्बन्धी सम्पूर्ण प्रक्रिया बन्द गरिएको तथा अब पूर्वनिर्धारित शुल्ककै आधारमा बक्यौता बुझाउनुपर्ने व्यवस्था गरिएको छ ।

साथै, गोरखापत्रमा २९ कात्तिक २०८१ मा प्रकाशित सूचनाअनुसार टीओडी मिटरमा रेकर्ड भएको माग (डिमाण्ड) र इनर्जी खपतका आधारमा गणना गरिएको बिलअनुसार रकम तिर्नुपर्ने प्राधिकरणले जनाएको छ ।

उद्योगीहरूले चाहेका खण्डमा २८ किस्तासम्म किस्ताबन्दी सुविधा उपलब्ध गराइने व्यवस्था पनि गरिएको छ । तोकिएको अवधिभित्र बक्यौता नबुझाए कानूनी कारबाही अघि बढाइने चेतावनी प्राधिकरणले दिएको छ ।