नेपालमा मनसुन सक्रिय, सोमबार मध्यमदेखि भारी वर्षाको सम्भावना

काठमाडौं । हाल मनसुनको न्यून चापीय रेखा सरदर स्थानको आसपासमा सक्रिय रहेको छ, जसको प्रभावस्वरूप देशभर सामान्य बदली देखिएको छ ।

बागमती, गण्डकी र लुम्बिनी प्रदेशका केही स्थानहरूमा तथा कर्णाली प्रदेशका थोरै स्थानहरूमा हल्कादेखि मध्यम वर्षा भइरहेको छ ।

मौसम पूर्वानुमानअनुसार सोमबार पनि देशभर सामान्यतया बदली रहनेछ । लुम्बिनी प्रदेश सहित देशका पहाडी भूभागका धेरै स्थानहरू र तराई भूभागका केही स्थानहरूमा मध्यम वर्षा हुने सम्भावना रहेको छ ।

त्यस्तै, गण्डकी, लुम्बिनी र कर्णाली प्रदेशका थोरै स्थानहरूमा तथा कोशी प्रदेशका एक–दुई स्थानमा भारी वर्षा हुने सम्भावना रहेको मौसम पूर्वानुमान महाशाखाले जनाएको छ ।

मौसममा यस्ता परिवर्तनसँगै जलस्रोतमा बहाव बढ्ने, पहिरो तथा बाढीको जोखिम पनि रहन सक्ने भएकाले सतर्कता अपनाउन सुझाव दिइएको छ ।