प्रधानमन्त्री कार्कीले ‘जेनजी’ आन्दोलनमा घाइते युवाको अवस्थाबारे जानकारी लिइन

काठमाडौं । प्रधानमन्त्री सुशीला कार्कीले ‘जेनजी’ आन्दोलनका क्रममा घाइते भएका युवाहरूको स्वास्थ्य अवस्थाबारे जानकारी लिन आज अपराह्न वीर अस्पतालस्थित ट्रमा सेन्टर पुगेर उनीहरूको अवस्था अवलोकन गरेकी छन् ।

प्रधानमन्त्री कार्कीले अस्पतालमा उपचाररत घाइतेहरूसँग कुराकानी गर्दै शीघ्र स्वास्थ्यलाभको कामना समेत व्यक्त गरिन् । आन्दोलनका क्रममा सुरक्षाकर्मी र प्रदर्शनकारीबीच झडप हुँदा धेरै युवा घाइते भएका थिए । प्रधानमन्त्रीको अस्पताल भ्रमणलाई पीडितप्रति सरकारको संवेदनशीलता र सहानुभूतिको संकेतको रूपमा हेरिएको छ ।

३६ जना भर्ना, ६ जनाको आईसीयूमा उपचार
ट्रमा सेन्टरका प्रमुख डा. बद्री रिजालका अनुसार हालसम्म सेन्टरमा ३६ जना घाइते भर्ना भएका छन् । तीमध्ये ६ जनाको सघन उपचार कक्ष (आइसीयु()मा उपचार भइरहेको छ । डा. रिजालले प्रधानमन्त्रीलाई दुई जनाको अवस्था गम्भीर रहेको जानकारी दिएका छन् ।

तत्काल शल्यक्रिया सम्भव छैन
डा. रिजालका अनुसार केही घाइतेको शरीरका विभिन्न भागमा गहिरो चोट लागेको छ । उनले प्रधानमन्त्रीलाई केही बिरामीमा शल्यक्रिया आवश्यक भए पनि चोट गम्भीर र संवेदनशील ठाउँमा भएकाले तत्काल शल्यक्रिया गर्न नसकिने अवस्था रहेको जानकारी गराए ।

प्रधानमन्त्री कार्कीले अस्पताल प्रशासनसँग उपचार प्रक्रिया छिटो, प्रभावकारी र उच्च मापदण्डअनुसार गर्न निर्देशन दिएकी छिन् । साथै, घाइतेका परिवारजनसँग पनि सम्वाद गर्दै उनीहरूको भावना बुझ्ने प्रयास गरेकी थिइन् ।