डा. सन्दुक रुइतको अपिलः ‘सार्वजनिक सम्पत्ति जोगाऔं, संयमित बनौं’

काठमाडौं । वरिष्ठ नेत्र चिकित्सक डा. सन्दुक रुइतले जेनजी पुस्तालाई संयमित रहन आग्रह गरेका छन् ।

असहिष्णु र भ्रष्ट राजनीतिक नेतृत्व पछाडि हटिसकेको बताउँदै उनले आन्दोलनका क्रममा सार्वजनिक सम्पत्तिमाथि आगजनी वा क्षति पुर्‍याउनु अनुचित हुने बताएका छन् ।

सामाजिक सञ्जालमार्फत आफ्नो भनाइ सार्वजनिक गर्दै डा. रुइतले भनेका छन्, ‘परिवर्तनका लागि सडकमा विरोध प्रदर्शन गरिरहनुभएका भाइबहिनीहरू, तपाईंहरूले देखाउनुभएको अदम्य साहसका कारण असहिष्णु र भ्रष्ट राजनीतिक नेतृत्व पछाडि हटिसकेको छ। यस्तो अवस्थामा सार्वजनिक सम्पत्तिमाथि आगजनी गर्नु वा नष्ट गर्नु उचित हुँदैन ।’

उनले सबै नागरिक मिलेर देश जोगाउने र बनाउनुपर्ने आवश्यकता औंल्याउँदै सार्वजनिक सम्पत्ति संरक्षणलाई पहिलो दायित्वका रूपमा लिन अपिल गरे ।

डा. रुइतले भने, ‘सार्वजनिक सम्पत्तिको संरक्षण गर्नु हरेक नागरिकको पहिलो दायित्व हो। तसर्थ, सार्वजनिक सम्पत्तिको नोक्सानी नगरौं र गर्न नदिउँ। संयम बनौं। सबै मिलेर देश जोगाऔं, सबै मिलेर देश बनाऔं ।’