बराहक्षेत्रमा खोलाले बगाउँदा एक बेपत्ता, एक घाइते

विराटनगर । सुनसरीको बराहक्षेत्र नगरपालिकामा खोलाले बगाउँदा एक जना बेपत्ता भएका छन् भने अर्की घाइते भएकी छन् ।

दूधपानी खोलाले बगाउँदा मोटरसाइकलमा सवार सर्लाही हरिवानका मनिष पाँचकोटी बेपत्ता भएका हुन् । उनकी श्रीमती सिलु खड्की घाइते भएकी छिन् ।

जिल्ला प्रहरी कार्यालय सुनसरीका अनुसार मोटरसाइकल सहित उनीहरूलाई खोलाले बगाएको हो । प्रहरी प्रवक्ता योगराज खतिवडाले बागमती प्रदेश ०२–०४७ प ७३८ नम्बरको मोटरसाइकल बराहक्षेत्र–१ दूधपानी खोला तर्दै गर्दा बगेको जानकारी दिएका छन् ।

मोटरसाइकल काठमाडौंबाट धनकुटातर्फ गइरहेको प्रहरीले जनाएको छ । घाइते खड्कीलाई धरानस्थित बिपी कोइराला स्वास्थ्य विज्ञान प्रतिष्ठानमा उपचार भइरहेको छ ।