प्रतिनिधि सभामा बादलको आरोपः ‘लोकतन्त्रमाथि वालेन्द्रतन्त्रको खतरा’

काठमाडौं । नेपाल कम्युनिष्ट पार्टी (एमाले) संसदीय दलका नेता रामबहादुर थापा ‘बादल’ले प्रधानमन्त्री बालेन्द्र शाह ‘बालेन’ नेतृत्वको वर्तमान सरकारमाथि लोकतान्त्रिक मूल्य–मान्यतालाई कमजोर बनाउँदै अधिनायकवादतर्फ उन्मुख भएको आरोप लगाएका छन् ।

बुधबार प्रतिनिधि सभाको बैठकमा बोल्दै उनले मुलुकमा लोकतन्त्र अहिले सबैभन्दा ठूलो संकटको चरणमा पुगेको दाबी गरे । रास्वपा नेतृत्वको सरकारका गतिविधिले लोकतान्त्रिक प्रणालीमाथि चुनौती सिर्जना गरेको उनको भनाइ थियो ।

बादलले नेपालको राजनीतिक इतिहास स्मरण गर्दै विभिन्न कालखण्डमा शासन व्यवस्थाको स्वरूप परिवर्तन भएको उल्लेख गरे । उनले २०१७ साललाई ‘महेन्द्रतन्त्र’, २०६१ साललाई ‘ज्ञानेन्द्रतन्त्र’सँग तुलना गर्दै अहिलेको अवस्थालाई ‘बालेन्द्रतन्त्र’को संज्ञा दिए ।

सरकारका निर्णय र कार्यशैलीमा अधिनायकवादी प्रवृत्ति झल्किएको आरोप लगाउँदै उनले लोकतान्त्रिक संस्थाहरूको संरक्षण र संवैधानिक मूल्यको रक्षा गर्न सबै राजनीतिक शक्ति सचेत हुनुपर्ने आवश्यकता औंल्याए ।