इन्द्रजात्रामा बालेनको उपस्थितिः राष्ट्रपतिलाई आफैँले गरे स्वागत, प्रधानमन्त्रीलाई गुरागाइले

काठमाडौं । काठमाडौं महानगरपालिकाका मेयर बालेन शाह यस वर्षको इन्द्रजात्रामा बसन्तपुर पुगे । उनले राष्ट्रपति रामचन्द्र पौडेलको स्वागत आफैं गरेका थिए तर प्रधानमन्त्री केपी शर्मा ओली उपस्थित हुँदा भने देखिएनन् ।

प्रधानमन्त्री ओलीको स्वागत महानगरपालिकाका प्रमुख प्रशासकीय अधिकृत सरोज गुरागाइँले गरे । गत वर्ष इन्द्रजात्रामा अनुपस्थित रहेका मेयर शाह यसपटक भने कार्यक्रमस्थल पुगेका थिए ।

विशेष पर्व, विशेष तयारी
भाद्र शुक्ल चतुर्दशीका दिन मनाइने इन्द्रजात्रा काठमाडौं, ललितपुर, भक्तपुर, धुलिखेल, दोलखा लगायतका क्षेत्रमा विशेष महत्वका साथ मनाइन्छ । राजधानी उपत्यकाबासीले विशेष पर्वका रूपमा मनाउने भएकाले काठमाडौं महानगरपालिकाले बसन्तपुरमा विशेष तयारी गरेर कार्यक्रम गर्ने परम्परा छ ।

राष्ट्रपति, प्रधानमन्त्रीलगायत उच्च पदस्थ अधिकारीहरूको उपस्थितिमा हुने यो पर्वमा आयोजकका हैसियतले मेयर र उपमेयरले स्वागत गर्ने चलन छ । यसपटक मेयर शाहले राष्ट्रपति पौडेललाई स्वागत गर्दै मञ्चसम्म साथ दिए तर प्रधानमन्त्री ओलीको स्वागत गर्न भने अनुपस्थित रहे ।

राजनीतिक मनमुटावको असर !
मेयर शाह र प्रधानमन्त्री ओलीबीच लामो समयदेखि तिक्तता रहँदै आएको छ । यसअघि मेयर शाहले प्रमुख प्रशासकीय अधिकृत सरोज गुरागाइँको कार्यक्षमतामा प्रश्न उठाउँदै संघ सरकारसँग कर्मचारी परिवर्तन गर्न माग गरेका थिए । तर प्रधानमन्त्रीकै कारण माग पूरा नभएको भन्दै उनले आलोचना गरेका थिए ।

गत वर्ष पनि ओलीसँगको खटपटकै कारण मेयर शाह इन्द्रजात्राको कार्यक्रममा सहभागी नभई भारत भ्रमणमा गएका थिए ।