पोखरेलको नयाँ कथासंग्रह ‘एक रातको बास’ सार्वजनिक

काठमाडौं । साहित्यकार लेखनाथ पोखरेलको नवीनतम् कृति ‘एक रातको बास’ पाठकमाझ आएको छ । यसअघि उनले नियात्रासंग्रह ‘फकलीको गाउँ’, कथासंग्रह ‘मार्बल हाउसकी शालिनी’, हास्य–निबन्धसंग्रह ‘चिबे–नकटो’ र उपन्यास ‘वनिता’ जस्ता कृतिहरू प्रकाशित गरिसकेका थिए । यो उनको दोस्रो कथासंग्रह हो ।

पोखरेलको ‘फकलीको गाउँ’ अंग्रेजी संस्करणमा समेत प्रकाशित भइसकेको छ ।

२०८ पृष्ठमा फैलिएको यस संग्रहमा १५ कथा समावेश छन् । यसमा कोरली, नियतिको खेल, पोल्टाको सिन्दूर, पहाडे मनई आइटा, सुनयना, लच्छुकी घरवाली, एक रातको बास, पराई सुख, सन्त्रास, माखे सांगलो, तिमीबाहेक, म को हुँ ?, आश्रम, आफलेको ठाँडो र यो पनि झुट हो ! समावेश छन् ।

यस संग्रहमा ‘एक रातको बास’ कथा शीर्षक कृतिको नामसमेत बनाइएको छ । पत्रकार कृष्ण भुसालले सम्पादन गरेको यस संग्रहमा ‘वृद्धको डायरी’लाई छुट्टै राखिएको छ ।

महाकाव्यकार खेमनाथ दाहालका अनुसार, “संग्रहमा समावेश कथाहरू गहन, जीवन्त र मार्मिक छन् । हास्य–व्यंग्य, स्मृति, जीवनशैली र प्रकृतिप्रतिको प्रेमलाई लेखकले कथा निर्माणका औजारका रूपमा प्रयोग गरेका छन् । ग्रामीण सामाजिक संरचना, मानवीय सम्बन्ध र संवेदनालाई सूक्ष्म तरिकाले प्रस्तुत गरिएको छ ।”

उनको भनाइमा, कथा केवल मनोरञ्जनका लागि नभई नेपाली गाउँ–परिवेश र बदलिँदो समाजका विविध रूपको चित्रण हो । सरल तर प्रभावकारी भाषा र शिल्पगत परिपक्वताले पाठकलाई आकर्षित गर्ने गुण यसमा पाइन्छ ।

लेखक पोख्रेल भन्छन् – “मैले हाम्रै परिवेशमा भएका विभिन्न कालखण्डका पदचाप, घटनाक्रम र अनुभूतिलाई कथामार्फत प्रस्तुत गरेको छु । बाँकी मूल्यांकन सुधी पाठककै जिम्मेवारी हो ।”
उनले समाजमा देखिएका सुख–दुःख, संवेदना र विसंगतिलाई यस संग्रहमार्फत उतारेका छन् ।

पछिल्ला दशकमा शहरी परिवेशलाई केन्द्र बनाएर कथा लेखन बढी हुँदै गएको बेलामा ‘एक रातको बास’ ग्रामीण जीवनशैली, सामाजिक सम्बन्ध र सामूहिक जीवनका कथा लिएर आएको छ । यसले नेपाली जीवन–यथार्थलाई प्रष्टसँग उजागर गर्नुका साथै साहित्यिक स्वाद र भावनात्मक गहिराइ पनि दिएको छ ।

सम्पादक कृष्ण भुसालका अनुसार, “यस संग्रहका कथा केवल मनोरञ्जनका स्रोत मात्र होइनन् । यी समाजको ऐना र जीवनका विविध आयामहरूको दर्पण पनि हुन् । पाठकलाई सोच्न, आत्मसमीक्षा गर्न र आफ्नै जीवनसँग जोड्न प्रेरित गर्ने क्षमता यसमा छ ।”

उपन्यासकार तथा विश्व कीर्तिमानी संगीतकार सन्तोष श्रेष्ठ भन्छन्, “पोख्रेलको यो संग्रह नेपाली कथासाहित्यमा सशक्त उपस्थिति हो । कथाहरूले मनोरञ्जनसँगै जीवनबोध र सामाजिक यथार्थको गहिरो अनुभूति प्रदान गर्छन् । सरल भाषा, प्रभावकारी शिल्प र संवेदनशील विषयवस्तुले यसलाई पठनीय बनाएको छ ।”

मोबाइल किताब प्रा.लि.ले यस कृतिको डिजाइन तथा छपाइ गरेको हो । पुस्तक आकर्षक आवरणसहित प्रकाशित गरिएको छ । यसको मूल्य ४५० रुपैयाँ निर्धारण गरिएको छ ।