तरुण दलको पाँचौँ महाधिवेशन मंसिर २६–२८ मा, भदौ १५ सम्म सदस्यता वितरण सम्पन्न गर्न निर्देशन

काठमाडौं । नेपाली कांग्रेसको भ्रातृ संगठन नेपाल तरुण दलले आउँदो मंसिर २६ देखि २८ गतेसम्म काठमाडौंमा हुने पाँचौँ महाधिवेशनका लागि विस्तृत कार्यतालिका तय गरेको छ ।

तरुण दलका अध्यक्ष विद्वान गुरुङले जिल्ला कार्यसमितिहरूलाई परिपत्र पठाउँदै भदौ १५ गतेभित्र सदस्यता वितरण प्रक्रिया पूरा गरी वडा र पालिकास्तरका अधिवेशन सम्पन्न गर्न निर्देशन गरेका छन् ।

परिपत्रअनुसार भदौ मसान्तसम्ममा तरुण दल केन्द्रीय कार्यालयले पूर्ण सदस्यता सूची स्वीकृत गर्नेछ भने त्यही समयभित्र क्षेत्रीय र जिलास्तरीय महाधिवेशन प्रतिनिधिहरू अनुमोदन गर्ने कार्य पूरा गर्ने बताइएको छ ।

यस्तै कात्तिक २० गतेभित्र संघीय तथा प्रदेशसभा निर्वाचन क्षेत्रका अधिवेशन सम्पन्न गर्ने र कात्तिक मसान्तसम्ममा जिल्लास्तरीय अधिवेशन टुंग्याउने कार्यतालिका तय गरिएको छ ।

तरुण दलले महाधिवेशनलाई सफल पार्न देशभरका संगठनात्मक संरचनाहरूलाई निर्धारित कार्यतालिका पालना गर्न आह्वान गरेको छ ।