बुधबार यी नदीमा आकस्मिक बाढीको उच्च जोखिम

काठमाडौं । हाल देशभर मनसुनी वायुको सक्रिय प्रभाव रहेको छ । मनसुनको न्यून चापीय रेखा नेपालको तराई भू–भागको उत्तरतर्फ सरदर स्थानमा अवस्थित रहेको जल तथा मौसम पूर्वानुमान महाशाखाले जनाएको छ ।

यसको असरस्वरूप पहाडी भू–भागमा अधिकांश स्थानमा बदली देखिएको छ भने तराईका अधिकांश भागमा आंशिकदेखि सामान्य बदली छ । कोशी र सुदूरपश्चिम प्रदेशका केही स्थानहरूमा मध्यम वर्षा भइरहेको छ ।

प्रमुख नदीहरूको बहाव सतर्कता आसपास
आज बिहानको मापन अनुसार कर्णाली, महाकाली र बबई नदीको बहाव सतर्कता तहको आसपासमा पुगेको छ । कोशी, नारायणी, कमला, बागमती, पूर्वी राप्ती, पश्चिम राप्ती तथा कन्काई नदीहरूमा भने बहाव सतर्कता तहभन्दा तल रहेको देखिएको छ ।

कैलाली र कञ्चनपुरमा उच्च जोखिम
बुधबार कैलाली, कञ्चनपुर तथा तिनका आसपासका जिल्लाबाट बग्ने साना नदीहरूमा बहाव उल्लेखनीय रूपले बढ्ने अनुमान गरिएको छ । यी क्षेत्रमा आकस्मिक बाढीको उच्च जोखिम रहेको बाढी पूर्वानुमान महाशाखाको चेतावनी छ ।

मध्यम जोखिमका क्षेत्रहरू
दाङ, बाँके, बर्दिया, जाजरकोट, डोल्पा, रुकुम पश्चिम, सल्यान, सुर्खेत र दैलेख जिल्लाबाट बहने साना नदीहरूमा पनि बहावमा उल्लेखनीय वृद्धि हुने देखिएको छ । यी क्षेत्रहरूमा आकस्मिक बाढीको मध्यम स्तरको उच्च सम्भावना छ ।

सम्भावित प्रभावित अन्य जिल्ला
त्यस्तै, सङ्खुवासभा, ताप्लेजुङ, पाँचथर, तेह्रथुम, रामेछाप, सोलुखुम्बु, भोजपुर, रसुवा, दोलखा, सिन्धुपाल्चोक, काठमाडौं उपत्यका (काठमाडौं, ललितपुर, भक्तपुर), रुपन्देही, नवलपरासी पूर्व र पश्चिम, कपिलवस्तु, खोटाङ, अछाम, बझाङ, डडेल्धुरा, डोटी, बैतडी र दार्चुला जिल्लाबाट बहने साना नदीहरूमा पनि आकस्मिक बाढीको मध्यम जोखिमको मध्यम सम्भावना रहने अनुमान गरिएको छ ।

सचेत रहन आग्रह
बाढी पूर्वानुमान महाशाखाले विशेषगरी जोखिमयुक्त क्षेत्रका बासिन्दाहरूलाई आवश्यक सतर्कता अपनाउन र सम्भावित बाढीजन्य घटनाबाट जोगिन पूर्वतयारी रहन आग्रह गरेको छ ।