२७ जिल्लामा आकस्मिक बाढीको सम्भावना, जल तथा मौसम विज्ञान विभागको सतर्कता

काठमाडौं । जल तथा मौसम विज्ञान विभाग अन्तर्गतको बाढी पूर्वानुमान महाशाखाले आइतबार (साउन ११) देशका २७ जिल्लामा आकस्मिक बाढीको मध्यम जोखिम रहेको भन्दै सतर्क रहन आग्रह गरेको छ ।

महाशाखाको पछिल्लो अपडेटअनुसार कोसी, नारायणी, कर्णाली, महाकाली, कमला, बागमती, पूर्वी राप्ती, पश्चिम राप्ती, बबई र कन्काई नदीहरूको बहाव हाल सतर्कता तहभन्दा तल भए पनि जलसतह तीव्र गतिमा बढ्ने अनुमान गरिएको छ ।

जिल्लागत रूपमा हेर्दा सिन्धुपाल्चोक, दोलखा, डोटी, अछाम, कालिकोट, दैलेख लगायतका क्षेत्रमा बहने साना नदीहरूमा पानीको सतह उल्लेखनीय रूपमा बढ्न सक्ने र आकस्मिक बाढीको उच्च सम्भावना रहेको विभागले जनाएको छ ।

त्यस्तै रामेछाप, सोलुखुम्बु, संखुवासभा, रसुवा, धादिङ, नुवाकोट, काभ्रेपलाञ्चोक, कास्की, लमजुङ, पर्वत, रुकुम (पूर्व र पश्चिम), सल्यान, सुर्खेत, जाजरकोट, जुम्ला, डोल्पा, मुगु, बझाङ, बैतडी, दार्चुला लगायतका जिल्लामा पनि मध्यम खतराको सम्भावना रहेको छ ।

सावधानी अपनाउन आग्रह गर्दै महाशाखाले यी २७ जिल्लालाई पहेँलो संकेत (Yellow Alert) जारी गरेको छ । यसले सम्भावित जोखिमप्रति सचेत रहनु पर्ने संकेत दिन्छ ।

बाढीका कारण हुने क्षति न्यून पार्न महाशाखाले नदी किनारमा बसोबास गर्ने तथा सवारी साधन चलाउनेलाई सावधानी अपनाउन आग्रह गरेको छ ।