देशका मुख्य सडक अवरुद्ध, यातायात मन्त्रालयमा आकस्मिक बैठक

काठमाडौं । लगातारको वर्षासँगै देशका मुख्य सडक अवरुद्ध भएपछि यातायात मन्त्रालयमा आकस्मिक बैठक बसेको छ । शुक्रबार रातिदेखि अवरुद्ध नारायणगढ–मुग्लिन सडकखण्ड खुलाउन कठिनाइ भएपछि मन्त्रालय सक्रिय भएको हो ।

नारायणगढ–मुग्लिन सडकखण्डको तुइनखोलामा लगातार पहिरो खसिरहेकाले यातायात पूर्णरूपमा ठप्प छ । यात्रुहरू रातिदेखि नै बाटैमा अलपत्र परेका छन् ।

यातायात मन्त्री कुलमान घिसिङको अध्यक्षतामा बसेको आकस्मिक बैठकमा सडक विभाग, गृह मन्त्रालय, यातायात व्यवसायी महासंघ तथा मजदुर प्रतिनिधिहरू सहभागी रहे । बैठकमा सरोकारवालाहरूले सडकको अवस्था र पहिरो हटाउने प्रयासबारे जानकारी गराएका छन् ।

ट्राफिक प्रहरीले जनाए अनुसार पहिरो खसेको क्षेत्रमा डोजर परिचालन गरिएको भए पनि निरन्तर पहिरो खसिरहेकाले काम गर्न सकिएको छैन ।

यस्तै, कोशी राजमार्ग र अरनिको राजमार्गका विभिन्न स्थानहरूमा पनि पहिरोले सडक अवरुद्ध पारेको छ । सम्बन्धित निकायहरूले ती सडक खुलाउने प्रयास जारी राखेका छन् ।