एमाले बैठकमा सुनुवारको व्यंग्यः ‘महाधिवेशनसँगै नेतामा देउता आउँछ !’

काठमाडौं । नेकपा एमालेको केन्द्रीय कमिटी बैठकमा सोमबार अनौपचारिक शैलीमा भएको एक टिप्पणीले हलमा हाँसोको माहोल बनाएको छ । केन्द्रीय सदस्य यज्ञराज सुनुवारले महाधिवेशन नजिकिँदै जाँदा केही नेतामा ‘देउता आउने’ लक्षण देखिने गरेको भन्दै कटाक्ष गरेका हुन् ।

उनले गाउँघरमा चाडपर्वको बेला धामी–झाँक्री चल्ने चलनको उदाहरण दिँदै एमालेमा महाधिवेशन आएपछि केही नेतामा त्यस्तै प्रवृत्ति देखिने आरोप लगाए । ‘देउता आएझैँ गरेर हल्ला मच्चाउने नेताबाट कार्यकर्ता र जनता त्रसित हुनुपर्ने अवस्था आउँछ,’ सुनुवारले भने ।

‘अघिपछि मौन, महाधिवेशनमा बखेडा’
सुनुवारले बैठकमा स्पष्ट रूपमा आरोप लगाए— पार्टीमा अघिपछि नेतृत्वसँग सधैँ चुपचाप रहने कतिपय नेता महाधिवेशनको बेला मात्र सक्रिय हुने, बखेडा झिक्ने र कार्यकर्ताको मनोबल कमजोर बनाउने काममा लाग्ने गर्छन् ।

उनको यो भनाइ पछिल्लो समय अध्यक्ष केपी शर्मा ओलीलाई नेतृत्व सुम्पन दबाब दिने नेताहरूलाई लक्षित देखिएको छ ।

‘पूर्वराष्ट्रपतिलाई राजनीति फर्काउने चेष्टा अनुचित’
सुनुवारले अर्को प्रसंगमा पूर्वराष्ट्रपतिहरूप्रति उच्च सम्मान आवश्यक रहेको भन्दै, ‘जो एकपटक राष्ट्रपतिको गरिमामा पुगे, उनीहरूलाई फेरि दलगत राजनीतिमा फर्काउने प्रयास अनुचित हुन्छ,’ भने ।

उनले पार्टीको सांगठनिक ढाँचा पनि देशको संवैधानिक र प्रशासनिक प्रणालीसँग मेल खाने गरी सुदृढ बनाइनुपर्ने सुझाव दिए ।