काठमाडौंंमा अनिश्चितकालीन कर्फ्यु आदेश जारी, बिहान ८ः३० बाट लागू

काठमाडौंं । काठमाडौं महानगरपालिकाको चक्रपथ क्षेत्रभित्र आज बिहान ८ः३० बजेदेखि अनिश्चितकालीन कर्फ्यु आदेश जारी गरिएको छ । प्रमुख जिल्ला अधिकारी छविलाल रिजालद्वारा हस्ताक्षरित सूचनामा कर्फ्यु अर्को आदेश नभएसम्म जारी रहने उल्लेख छ ।

कर्फ्यु आदेश काठमाडौं महानगरपालिकाभित्र चक्रपथ क्षेत्रभर लागू हुनेछ । यसमा पूर्वतर्फ बालकुमारी पुलदेखि कोटेश्वर चोक, उत्तरतर्फ सिनामंगल, गौशाला, चाबहिल, नारायणगोपाल चोक, पश्चिमतर्फ गोङ्गबु, बालाजु, स्वयंम्भु र दक्षिणतर्फ कलंकी, बल्खु हुँदै बागमती नदीको पुलसम्म समावेश छन् ।

यस क्षेत्रमा कुनै पनि प्रकारको आवतजावत, भेला, जुलुस, प्रदर्शन, सभा वा बैठक गर्न नपाइने स्पष्ट गरिएको छ ।

अत्यावश्यक सेवाका सवारीसाधन, एम्बुलेन्स र दमकल, शव वाहन, स्वास्थ्यकर्मीका सवारी, सञ्चारकर्मीका सवारी, पर्यटक सवारी साधन, मानव अधिकार र कूटनीतिक नियोगका सवारी, हवाई यात्राका लागि टिकट देखाएर यात्रा गर्ने यात्रुलाई मात्रै आवतजावत गर्न दिइनेछ । तर त्यसका लागि सुरक्षाकर्मीहरूद्वारा सहजीकरण गरिनेछ ।

प्रशासनले नागरिकलाई आदेशको पूर्ण पालना गर्न अनुरोध गरेको छ र उल्लंघन गरे कानुनी कारबाही गरिने चेतावनी पनि दिएको छ ।