बीपी राजमार्गमा राति गाडी चलाउन एक महिना रोक, जोखिम न्यूनीकरणको प्रयास

काभ्रेपलाञ्चोक । बाढी र पहिरोको बढ्दो जोखिमका कारण बीपी राजमार्गअन्तर्गत काभ्रेपलाञ्चोक खण्डमा आज (साउन १ गते) देखि एक महिनासम्म राति गाडी चलाउन रोक लगाइएको छ । काभ्रेपलाञ्चोक जिल्ला प्रशासन कार्यालयले काभ्रेभञ्ज्याङदेखि सिन्धुली सिमाना नेपालथोकसम्मको राजमार्ग खण्डमा साँझ ५ बजेदेखि बिहान ५ बजेसम्म सवारी आवागमन निषेध गर्ने निर्णय गरेको हो ।

जिल्ला प्रशासनले जारी गरेको सार्वजनिक सूचनामा मनसुन सक्रिय रहँदा बाढीपहिरोको सम्भावित जोखिमलाई लिएर सतर्कता अपनाइएको उल्लेख छ । जोखिम न्यूनीकरण तथा जनधनको सुरक्षालाई प्राथमिकतामा राख्दै यातायात रोक्ने निर्णय गरिएको प्रमुख जिल्ला अधिकारी उमेशकुमार ढकालले जानकारी दिए ।

यसअघि पनि असार महिनाको दोस्रो साता यता दस दिनसम्म रातको समयमा राजमार्गमा आवागमन रोकिएको थियो । त्यतिबेला सवारीहरूलाई काभ्रेको काभ्रेभञ्ज्याङ र सिन्धुलीको खुर्कोटमा रोकिने व्यवस्था गरिएको थियो । पछिल्लो निर्णयअनुसार अब सवारीहरू सिन्धुलीतर्फबाट आउनेलाई नेपालथोकमा र काठमाडौंतर्फ जानेलाई काभ्रेभञ्ज्याङमै रोकिनेछ ।

गत एक सातामै काभ्रेपलाञ्चोक खण्डमा चारपटक बाढी र पहिरोका कारण सडक अवरुद्ध भइसकेको छ । यस्तै, अघिल्लो वर्षको असोजमा परेको बाढीले चौकीडाँडादेखि वर्षेखोलासम्मको करिब आठ किलोमिटर सडक बगाएपछि कतै एकतर्फी त कतै दुइतर्फी गरी अस्थायी रूपमा सडक सञ्चालन गरिएको थियो ।

राजमार्गको १६० किलोमिटर दूरीमध्ये सिन्धुलीको खुर्कोटदेखि नेपालथोकसम्मको ३४ किलोमिटर र त्यसपछि नेपालथोकदेखि धुलिखेलसम्मको ५० किलोमिटर खण्डमा विशेषगरी ठूलो क्षति पुगेको छ ।

स्थायी सुधारका लागि सरकारले राजमार्गलाई चार खण्डमा विभाजन गर्दै निर्माण तथा मर्मतको प्रक्रिया अघि बढाएको छ । बीपी राजमार्ग पूर्वी नेपाल जोड्ने छोटो तथा व्यस्त मार्गको रूपमा परिचित छ, जहाँ दैनिक हजारौं सवारी साधन चल्ने गर्छन् ।