एमाले सचिवालय बैठक आइतबार ओली निवासमा, ‘जेनजी’ प्रदर्शनपछि पहिलोपटक बस्दै

काठमाडौं । नेपाल कम्युनिष्ट पार्टी (एमाले) को सचिवालय बैठक आइतबार बस्ने भएको छ । पार्टी अध्यक्ष केपी शर्मा ओलीले बैठक आइतबार दिउँसो १ बजेका लागि बोलाएको एमाले प्रचार तथा प्रकाशन विभाग प्रमुख राजेन्द्र गौतमले जानकारी दिएका छन् ।

उनका अनुसार बैठक भक्तपुरको गुण्डुस्थित अध्यक्ष ओलीको निजी निवासमा आयोजना हुनेछ ।

गौतमका अनुसार बैठकमा हालै सम्पन्न ‘जेनजी’ प्रदर्शनपछि उत्पन्न राजनीतिक परिस्थितिबारे विस्तृत छलफल हुनेछ । त्यस घटनाक्रमले पार्टीभित्र पारेको असर, रणनीतिक प्रतिक्रिया तथा आगामी कदमबारे बैठकमा गम्भीर समीक्षा गरिने बताइएको छ ।

साथै, पार्टीको भूमिकाबारे स्पष्टता ल्याउने, संगठनात्मक सुदृढीकरण गर्ने र भावी कार्यक्रम निर्धारण गर्ने विषयमा पनि बैठकमा ठोस निर्णय लिइने अपेक्षा गरिएको छ ।

जेनजी आन्दोलनपछिको यो पहिलो सचिवालय बैठक हो, जसले एमालेको आगामी कार्यदिशा तय गर्ने संकेत गरिएको छ ।