सर्लाहीमा ट्रकमा करेन्ट लागेर सहचालकको ज्यान गयो, दुई गम्भीर घाइते

काठमाडौं । सर्लाही जिल्लाको लालबन्दी नगरपालिका–१ स्थित लखनदेही पुल नजिक ट्रकमा करेन्ट लाग्दा एक जनाको मृत्यु भएको छ भने दुई जना गम्भीर घाइते भएका छन् ।

प्रहरीका अनुसार, मृतक रौतहटको बृन्दावन नगरपालिका–७ निवासी ३० वर्षीय दिनेश पासवान हुन्, जो ट्रकका सहचालक थिए । घटनामा सोही ठाउँका २५ वर्षीय कुन्दन पासवान र ४० वर्षीय जागेश्वर पासवान घाइते भएका छन् ।

बिहीबार बिहान करिब ६ः४५ बजे रौतहटबाट धानको भुस लिन आएको ना.६ ख ७५५० नम्बरको ट्रकमा लोडिङको क्रममा दुर्घटना भएको हो । न्युँ माँ राजदेवी राइस मिल, लालबन्दीमा भुस राख्ने क्रममा ट्रकले ११ हजार भोल्ट क्षमताको विद्युत् तार छोएको थियो । करेन्ट लागेको कारण ट्रकमा रहेका तीनै जना चपेटामा परेका थिए ।

इलाका प्रहरी कार्यालय नवलपुरबाट गएको टोलीले तत्कालै घाइतेहरूलाई उद्धार गरी हरिवनस्थित नमुना अस्पताल पुर्याएको थियो । तर, उपचारका क्रममा सहचालक दिनेश पासवानको ज्यान गएको प्रहरीले जनाएको छ । बाँकी दुई जनाको अवस्था गम्भीर रहेको बताइएको छ ।