एसईई नतिजा असारको अन्त्यतिर सार्वजनिक हुने तयारी

काठमाडौं । माध्यमिक शिक्षा परीक्षा (एसईई) को नतिजा असारको तेस्रो साताभित्रै सार्वजनिक गर्ने गरी राष्ट्रिय परीक्षा बोर्डले तयारी थालेको छ ।

पहिले तय भएको कार्यतालिका अनुसार असार ६ गतेभित्र नतिजा प्रकाशित गर्ने योजना थियो । तर, उत्तरपुस्तिका परीक्षणमा भएको ढिलाइका कारण तालिका अनुसारको नतिजा प्रकाशन सम्भव भएन ।

परीक्षा नियन्त्रण कार्यालय, कक्षा १० का नियन्त्रक डा. गणेशप्रसाद भट्टराईका अनुसार, चैतमा शिक्षकहरूले गरेका आन्दोलनका कारण उत्तरपुस्तिका मूल्याङ्कनमा झन्डै ३२ दिन ढिलाइ भएको छ ।

गत वर्ष चैत २० गतेदेखि वैशाख १७ गतेसम्म शिक्षकहरूले काठमाडौँमा सडक आन्दोलन गरेका थिए । आन्दोलनकै कारण उत्तरपुस्तिका समयमै परीक्षण गर्न नसकिएको र त्यसले सम्पूर्ण प्रक्रिया प्रभावित भएको भट्टराईले जानकारी दिए ।

हाल उत्तरपुस्तिका परीक्षण तथा सम्परीक्षण कार्य सकिएर नतिजा इन्ट्रीको काम भइरहेको उनले बताए । ‘सम्परीक्षण सकिएपछि इन्ट्री र प्रोसेसिङमा मात्रै ३५ दिन लाग्छ,’ उनले भने, ‘शिक्षक आन्दोलनले ती ३५ दिनलाई सुरु गर्नमै ३२ दिन ढिलो गरायो ।’

ढिलाइलाई घटाउन बोर्डले डबल सिफ्टमा काम गरिरहेको भट्टराईको भनाइ छ । ‘हामी दिनरात काम गरेर ३२ दिनको ढिलाइलाई १०–१६ दिनमा झार्ने प्रयास गरिरहेका छौं,’ उनले स्पष्ट पारे ।

बोर्डले हाल असारको तेस्रो वा चौथो साता भित्रमा नतिजा प्रकाशित गर्ने लक्ष्य राखेको छ । यद्यपि, सटिक मिति भने अझै तय भइसकेको छैन ।

यस वर्ष चैत ७ देखि १९ गतेसम्म सञ्चालन भएको एसईई परीक्षामा करिब ५ लाख विद्यार्थी सहभागी भएका थिए । नतिजा ढिलाइ भएपछि कक्षा ११ को भर्ना प्रक्रिया पनि प्रभावित हुने देखिएको छ ।

बोर्डको वार्षिक कार्यतालिका अनुसार असार ६ भित्र नतिजा प्रकाशित गर्ने, असार २२ सम्म पुनर्योगको लागि आवेदन लिने, साउन १२ गते पुनर्योग नतिजा सार्वजनिक गर्ने र साउन १९–२० गते पूरक परीक्षा सञ्चालन गरिने योजना थियो । पूरक परीक्षाको नतिजा भदौ २० भित्र सार्वजनिक गर्ने योजना पनि कार्यतालिकामा समावेश थियो । तर, मुख्य नतिजा नै ढिलाइ हुने भएपछि बाँकी कार्यक्रमहरू पनि पछि सर्न सक्ने संकेत देखिएको छ ।