खिजीदेम्बामा पहिलोपटक शव वहान सञ्चालन, दाताको साथ

ओखलढुङ्गा (खिजीफलाटे) । खिजीदेम्बा गाउँपालिका अब शव बोक्न ट्र्याक्टर रिजर्भ गर्नुपर्ने बाध्यताबाट मुक्त भएको छ । गाउँपालिकाले पुरानो, थन्किएको एम्बुलेन्सलाई मर्मत गरी शव वहानको रूपमा सञ्चालनमा ल्याएको छ । यो कार्य स्थानीय सरकारको पहल र वैदेशिक दाताको सहयोगमा सम्भव भएको हो ।

गाउँपालिका अध्यक्ष गम्बु शेर्पाको अगुवाइमा थालिएको यो अभियानले गाउँको स्वास्थ्य सेवामा एउटा संवेदनशील र पूर्वाधारको दृष्टिले लामो समयदेखि उपेक्षित क्षेत्रको अभाव टारेको छ । शेर्पा समाज वेल्जियम र जर्मनको आर्थिक सहयोगले ९ लाख १३ हजार रुपैयाँको लागतमा बिग्रिएको एम्बुलेन्स मर्मत गरिएको हो । मर्मत गर्ने वर्कसपले समेत ६३ हजार रुपैयाँ छुट दिएको पालिकाले जानकारी दिएको छ ।

दुवै देश पुगेका अध्यक्ष, गीत गाउँदै गरे अपिल

खिजीदेम्बा अध्यक्ष गम्बु शेर्पा राष्ट्रिय स्तरका गायक पनि हुन् । यही पहिचानलाई प्रयोग गर्दै उनले वेल्जियम र जर्मनस्थित शेर्पा समाजको ल्होसार विशेष कार्यक्रममा सांगीतिक प्रस्तुति दिएर गाउँका लागि शव वहान आवश्यक रहेको अपिल गरेका थिए । उनको भावनात्मक अपिलले दाताहरूको मन छोयो र सहकार्यका ढोका खुले ।

शव वहान नहुँदा अपमानजस्तै बाध्यता

अहिलेसम्म खिजीदेम्बामा शव वहानको अभावले मृत्यु पश्चातको प्रक्रियालाई पीडादायक बनाइरहेको थियो । कुनै सदस्य गुमाएका परिवार शव पोष्टमार्टम गर्न रुम्जाटार वा रामेछापको मन्थली लैजान महँगो भाडा तिरेर ट्याक्टर वा निजी सवारी खोज्न बाध्य थिए । शव बोकेर सडकमै रोकिने, गाडी नपाउने, मानवीय गरिमामा आँच आउने अवस्था थियो ।

गाउँपालिका अध्यक्ष शेर्पा भन्छन्, ‘हामीसँग एम्बुलेन्स थिए तर त्यो थन्किएको थियो । एउटा सानो पहलबाट अहिले त्यो सेवा बन्न सक्यो । अब कसैको मृत्यु भएपछि परिवारलाई अपमानजनक यात्रा गर्नुपर्दैन ।’

सांस्कृतिक पार्कमा समेत सहयोग

शेर्पा समाज वेल्जियम र जर्मनले खिजीदेम्बाको सांस्कृतिक पहिचान जोगाउने अभियानमा पनि हातेमालो गर्ने भएका छन् । गाउँमा निर्माण गरिने सांस्कृतिक पार्कमा समेत सहयोग गर्न दाताहरूले प्रतिबद्धता जनाएका छन् ।

खिजीदेम्बा जिल्लाकै पहिलो पालिका

शव वहान सञ्चालन गर्ने खिजीदेम्बा ओखलढुङ्गाको पहिलो स्थानीय तह हो । जिल्लाका अन्य पालिकामा अझै एम्बुलेन्स सेवा नपुगेको अवस्थामा, खिजीदेम्बाले पाँचवटा एम्बुलेन्स सञ्चालन गरी उदाहरणीय पहल देखाएको छ ।

अन्ततः– मानवीय सेवामा संगीतको माध्यम

यो उदाहरणले देखाउँछ— कुनै पनि सामाजिक पूर्वाधारको खाँचो पुरा गर्न सरकारको बजेटभन्दा पनि इच्छाशक्ति, समुदायको विश्वास र संलग्नता महत्वपूर्ण हुन्छ । गाउँको सेवा र पहिचानको प्रतिनिधित्व गर्ने एकजना गायक अध्यक्षले आवाज मात्र होइन, सेवा पनि पुर्‍याएका छन् ।